عن الجواد أتسألچ العين .. والله يا دنيه
تشبه غربته غربة حسين .. والله يا دنيه

يدنيه منين أبدي وياچ سالفتي
وجسد تاسع إمام بلا دفن شفتي
طيحت دمعه من جفن الزمن طحتي
وظل جسم الجواد بلا نعش صحتي
وين اليشيلون النعش وين .. والله يا دنيه
تشبه غربته غربة حسين .. والله يا دنيه

يدنيه الموت من تتعدد أسبابه
حاسب كل نهاية عمر بحسابه
والعشيرن عمره يشيب أصوابه
صعب عليه يفارگ أهله وأحبابه
هذا الغريب بغربة البين .. والله يا دنيه
تشبه غربته غربة حسين .. والله يا دنيه

گضه نحبه غريب وغربته أبموته
وأذا ليلى سكن ما ينسمع صوته
لا يمه أهل وتشيل تابوته
ولا ناعي نعه ولا ناس مبخوته
حادي المصايب يحدي لاوين .. والله يا دنيه
تشبه غربته غربة حسين .. والله يا دنيه

يدنيه الغالي راح وخلصت أيامه
عجيبه الموت ذبل زهرة أحلامه
والسلب حسين وفرهد أخيامه
رجع سم الجواد وخان العمامه
هاي العلامه بطول السنين .. والله يا دنيه
تشبه غربته غربة حسين .. والله يا دنيه

كتب قصة حياته الزمن بچفوفه
يذكر بالحسن كل حرف بحروفه
وأم الفضل مو بالفضل معروفه
مثل جعده حقدها عليهم نشوفه
وسط الجوانح تشب نارين .. والله يا دنيه
تشبه غربته غربة حسين .. والله يا دنيه

يدنيه الغالي غالي وما تغيرينه
أذا للأجل راح وغمضت عينه
نتوادع وداع الموت خلينه
تفصال الجروح مفصله علينه
جرح المصايب صار جرحين .. والله يا دنيه
تشبه غربته غربة حسين .. والله يا دنيه

تعنت فاطمه يم گمر دنياها
وهاي أم الأخدر تمشي أوي ممشاها
يم نعش الجواد الليله شفناها
وأرض الكاظميه تنوح وياها
يم الجواد أنشوف گلبين .. والله يا دنيه
تشبه غربته غربة حسين .. والله يا دنيه