خلصت وكل الچوادر طايحه
وكسرّت الخدام كسرّت فاتحه
لا تگول الخدمه خلّصت هايه
الخدمه مثل حسين هم هوايه
إحنه ماي وكل وكت مشايه
الوادم الترجع تعزّب الرايحه
كلها لحسين المواكب راحت
وانته اول فاتحه الما طاحت
حته الزغار التحبك صاحت
انته اجمل صوره بالحب سارحه
احچي بدموعك وسولف بالوفه
سبي زينب وينه وين الفلسفه
تره حسين يريد دمعه ومعرفه
بالبواچي خلي عينك شابحه
لا تگول الخدمه منا ونتهت
فاتحة زينب تره توها بدت
لحضه لو عينك عليها ما بچت
بيدك اعميها بثواب النايحه
عيش خادم وفتخر عالوادم
ماكو اي سلطان مثل الخادم
عاشگ وظل بحبيبك هايم
وخلي شيباتك نوارس واضحه
احنه كلما نكبر بخدمتنه
يوسف الخدمه بشبابنه يردنه
احنه غير الله وحسين شعدنه
باهته الدنيه وخدمتك مالحه
روحك شما بالمشاكل حايره
طلگ الدنيه بثلاثه الخاطره
ان شاء الله اتظل المواكب عامره
والحناجر بالمجالس صادحه

ـ


كلمات الشاعر : عباس طالب السِعيدي


-

MP3