هنا

[ღ عِشق ღ]

ـــــــــــــــــــــــــ ـــــــــــــــــــــــــ ـــــــــ
القَصيدة: عيون الحَسن
أداء:مُحمّد بَاقِر الخَاقانيّ
كلمات: عَبّاس الشِبلاوي
ـــــــــــــــــــــــــ ـــــــــــــــــــــــــ ــــــــ
عيون الحَسن بعيون الحِسين
ودموع تجري عيُون الإثنين
هَاي آخِر انفاس الحَسن.. ليلة كِدر ليلة مِحن
بعيون الحِسين.. بعيون الحِسين
ـــــــــــــــــــــــــ ـــــــــــــــــــــــــ ـــــــــ
ثَاني حِزام ابو القَاسِم بَعد حِيدر يِفگده حسين
بَانت حَنيته بمگفاه بوداعه ودموع العين
يِگلّه مِنازعك هـٰذا اخَذ مِن حِيل اخوك سنين
رِجع بيّه لجروح البَاب واحس بيّه كسر ضِلعين
گِعدوا غريب بصف غَريب بليلة الرِزيّة
چَم سَاعة وِلد الزَهرة وتفارگهم المِنيّة
عين الحُسين اعله الچَبد والسم جَرت دَمعها
وعين الحَسن تجري ويِصيح الشِدّة غَاضِرية !
لا يُوم مِثل مُصاب الطفوف
باچر اشدّ مِن مَقتلي تشوف
هِناك المُصيبة المُؤلمة.. مِن يِرسم جروحه الضِما
بعيون الحِسين.. بعيون الحِسين
ـــــــــــــــــــــــــ ـــــــــــــــــــــــــ ـــــــــ
إخوان وكِلمن بضيمه وشِدّة جَرحه يِتلوّه
الحَسن مِن چَبدته وحسين بهضم يتلوّه عَ الخِوّة
تِصدّ لوجه اخوه عِينه مِن السَم صار مُو هُوَ !
ثِگل جِسم الغريب وصَار يِفتح عينه بالگوّة
مِن السَم نِشف دَمّ الحَسن واخضر صبح يَجسمه
وعيونه غَارت والنفس ما يِگدر اعله شَمّه
يِشهگ غِدا وويّ شهگته يفرك چفوفه اخيّه
فات الوَكت ما ضل دِوا يعين الوِلي اعله سَمّه
سم غَدره ماشي بكِل كِتر بي
وحسين حَاير شِنهي بِ ايديه؟
لا ونّ اخيّه الينگطع.. لا يِنشف لجَرحه الدَمع
بعيون الحِسين.. بعيون الحِسين
ـــــــــــــــــــــــــ ـــــــــــــــــــــــــ ـــــــــ
بحِجر حِسين حَط راسه وبِدا اعليه الوِجع يكبر
ويِقذف صَار احشائه ب طشت مِن حِين إلىٰ آخِر
وإذا بيها عَقيلتهم لدِيار الحَسن تِحضر !
زِينب والحَسن مَا راد تِشوف بعينها المَنظر
وبصوته نَادىٰ يا اخي ومِن السَم يِتعذّب
مِن يَمّي نَحّيه الطشت عَن لا تِشوفه زَينب
جَابت دِواي وما اريد اكسر يَـ خَيّ گلبها
ولو تِدري شنهي الـ بالطشت تِگعد عليه تنحب
گِدّام زينب ضُم الدِموع
لا تِفتح اعله المُوت مَوضوع !
گلب العَقيلة يِنكسر.. لو شَافت جروح الهَجر
بعيون الحِسين.. بعيون الحِسين
ـــــــــــــــــــــــــ ـــــــــــــــــــــــــ ـــــــــ
حَسن خُوية وإذا نَحّيت عَنّك طَشتك المَأذيك
زينب اوّل وتالي مِن عيونك تَعرف شبيك !
شِيضمّه مِنازعك عنها؟ وحَرّ السَم المخلّيك
تِرجف يا حَسن وتِونّ وتِمدّ وترفع برجليك
ما يِنضم اعله إختك جرح زينب تَرا تَعرفنا !!
مِن نَظرة لِينا يِحس گلبها وتعرف بِ ألمنا
وشِراح اگلّ لأُم الخِدر لو نِشدت اعله وَضعك؟
حَيّرت اخوك ببينك وبين الغَريبة إختنا
يَـ الوگّفتني اعليك مِحتار
نَار الحچي والسَكتة هم نار
مِن هَسّه يا خُوية إبتدت.. عَازة الخِوّة وبَيّنت
بعيون الحِسين.. بعيون الحِسين
ـــــــــــــــــــــــــ ـــــــــــــــــــــــــ ـــــــــ
تِرحمّوا لوالدي واقروا الفاتِحة علىٰ روحه
إِسمه: عَبد الرزّاق صَالح

[الأرجوان]

تسلمين