ـــــــــــــــــــــــــ ـــــــــــــــــــــــــ ــــ
القصيدة: بدا حب إسمك
أداء:محمد باقر الخاقاني
كلمات:عباس الشبلاوي
ـــــــــــــــــــــــــ ـــــــــــــــــــــــــ ــــــ
ضايع والدلاني ببابك حنيتك
مولاي وشفت الحب دمعه بتعزيتك
من أول دمعه جرت
من عيني لهمك بدا حب إسمك
ـــــــــــــــــــــــــ ـــــــــــــــــــــــــ ــــــ
اول ما اجه بسمعي اسمك ونا هل دمعي
من عدها اختلف وضعي ومشى بروحي هواك
لگيت اسمك امان وحب وصحت ودموع عيني تصب
حسين وغيره شأرد اطلب؟؟!. يهنياله اللگاك...

دمعتك خذتني من اديه لرحمتك
شخص ثاني صرت من اهد ما خدمتك
انعم الله على خيرك صحت من ضميري
أقبلت مثلي واحد ينوح لغربتك

شكرا يامولاي لفضلك وألطافك
يابخت الحبك والخاسر من عافك
حسين ولا ثاني الك ياسيدي بروحي
يادوه جروحي من أول دمعة جرت
ـــــــــــــــــــــــــ ـــــــــــــــــــــــــ ــــــ
عجيب بكلشي ما وصفوك القروك منين ما يقروك
برئفتك تختلف شافوك وطن كل اليحير
بلا رأي العبد شفته مجبر يرضي مالكته
اليخير عبده بس انتَ ولا تكسر فقير

لچن گلبلك الما كسر خاطر أحد
امس بالصحاري وگف حاير شگد
العطش طب خيامه ويشوف اخته زينب
تنوح الكفلها المشه وليها ما رد
عطشان وگلبك كل همه لعيالك
تكابر شافوك بحزنك و ألامك
يم گلبك كلشي عجز ما توصفك كلمه
يأ ضوة الرحمه من اول دمعة جرت
ـــــــــــــــــــــــــ ـــــــــــــــــــــــــ ــــــ
يا مثل النفس و الماي ولا تنعاف يامولاي
صار الها طعم دنياي على الخدمه من اجيت
شيعرف الما عرف مثلك؟! يالمغطي الخدم ضلك
بس بالغاضريه اهلك حياره بلايه بيت

استحي احچي بخدمتك واگولن خدمته
استحي ابچي واگولن بچيت لغربته
شأقدمله بأسنيني لا شي اشوفه
ولا يوفي لحظه ضمه بخيمة اخته

يالمنطيني خيامك گلبي شقدملك ؟!..
حته الخدمة ودمع عيوني من فضلك
ما ألي بهاي فضل من جفك الخدمه
يولي النعمه من اول دمعة جرت
ـــــــــــــــــــــــــ ـــــــــــــــــــــــــ ــــــ
عطاياك وعطف گلبك تجبر ناس تحبك
راحت هالخدم قربك وطن گلبك تشوف
واذا مو بسمك أبديها السوالف لذه مابيها
وكون بدمعتي أنهيها على جرح الطفوف

جرح طف عذابك دمع حسرة شفنا
وسوالفنا صارت حبيبي حسينا
الحچه بغيرك ندير نواظرنه عنه
واليگول حسينا نصيح احنه ويلاه

كل احچايه بغيرك صارت تجرحنه
وبس الدمعة التجاري لحزنك راحتنه
يالضامي وهذا عهد ما ينگطع حزني
ياجرح وني من اول دمعه جرت
ـــــــــــــــــــــــــ ـــــــــــــــــــــــــ ــــــ