ـــــــــــــــــــــــــ ـــــــــــــــــــــــــ ــــ
القصيدة: كربلاء لا زلت
أداء:محمد باقر الخاقاني
كلمات: منتظر الجنابي
ـــــــــــــــــــــــــ ـــــــــــــــــــــــــ ــــــ
كربلاء لا زلتِ كرباً و بلاء
ورثتي لأل المصطفى
ياكربله النحيب...
ـــــــــــــــــــــــــ ـــــــــــــــــــــــــ ــــــ
عن رزاياچ التطيش الها العقول
بله يا گاع الطفوفْ شأرد اگول؟!.
شلون ما اسمچ يورثني الجروح
وانتِ ورثتي الكرب لأل الرسول

غرباء هم أصبحوا بأرضچ عجيب!!.
غرباء وأصبحتي انتِ أرض الغريب
والغربة صارتلچ صفه
ومستوطنچ غريب
ورثتي لأل المصطفى
ياكربله النحيب...
ـــــــــــــــــــــــــ ـــــــــــــــــــــــــ ــــــ
جتچ اشرف نسوه واشراف الرجال
كرموچچ و بيچ حطوها الرحال
الجمال بصحرتچ حل واستراح
ليش ذبل حرچ ألوان الجمال؟!.

والفرات يجري وعطش يتعذبون
والفرات مهر امهم وما يرتون
ياطف على الدنيا العفا
لو ما روى الحبيب
ورثتي لأل المصطفى
ياكربله النحيب...
ـــــــــــــــــــــــــ ـــــــــــــــــــــــــ ــــــ
ما يسد حزنچ دمع كل الأنام
الينطي حگ مصيبتچ بس الامام
ما مثل كربچ كرب يا كربلاء
وانتِ حرمتي على الساده المنام

هل المصاب بچاها دم عين السماء
هل المصاب اقرح جفون الاولياء
للجرحه ينزف ما شفه
و بالدم وگع خضيب
ورثتي لأل المصطفى
ياكربله النحيب...
ـــــــــــــــــــــــــ ـــــــــــــــــــــــــ ــــــ
كربله يعني عذاب و يعني ويل
يعني أطفال و نسا بلايه كفيل
بيچ برزن نسوة من ذيچ الخدور
شافن على خيامهن متوجهة خيل

و الخيام كافلها يم العلگمي
و الخيام يحرسها ما ضل هاشمي
كلهم ضحايه اهل الوفه
و هذا الفزع قريب
ورثتي لأل المصطفى
ياكربله النحيب...
ـــــــــــــــــــــــــ ـــــــــــــــــــــــــ ــــــ
بيچ صار القبل ما ممكن يصير
بخيم اهله ملجأ الحاير يحير
و الاميرهة اتحيرت يا كربلاء
و عالتراب يجود بأنفاسه الامير

عالتراب واگع وريث الانبياء
عالتراب و النار شبت بالخباء
شب المخيم و أنطفه
و محد فزع عجيب!!.
ورثتي لأل المصطفى
ياكربله النحيب...
ـــــــــــــــــــــــــ ـــــــــــــــــــــــــ ــــــ