القصيدة: جا هو غير العباس
أداء: مسلم الوائلي
كلمات: علي حسن علوان
~~~~
مو مسألة جربه وماي
لا مسألة رايح جاي
گالوا يشبهونه هواي
.. وين اربعينه
جا هو غير العباس
لا ينوصف لا ينقاس
گبل السهم تدري الناس
.. متروسه عينه
~~~~~~~
لو وگف عالماي يسوه الماي حته الماي منه يغار
براسه شايل ريشه حته الجيش گام يصيح يا ستار
من بعد يرمون محتارين شيلاگون راسه الحار
لو برد يدرون ما مضمون صعبه يموت مثل الثار
راجلاً بس دخيله مركض الخياله
جفوفه حلوات يذبهن تصير احلاله
حسبوا مات بعد ما يهم للتالي
راسه مگطوع والحسين يدور اباله
يوصل مثل ملك الموت
ياخذ الروح بلا صوت
حته الهوه اليمه يفوت
.. يصبح رهينه
جا هو غير العباس
لا ينوصف لا ينقاس
گبل السهم تدري الناس
.. متروسه عينه
~~~~~~
باقي قلع الباب ويصدگون ويسموه داحي الباب
براسه يطلع شيب بس والله يم حسين يرجع شاب
بالخيم نسوان علويات عطشانات مدمع صاب
لو هوه اعله الگاع هالنسوان فوگ الروس تلگه اتراب
من بده حسين يطيح عمود الخيمه
حضروا نوگ والأطفال نذر للهيمه
صاح الحسين يعباس مكانك خالي
ويا فراغك بعد ما تسده الغيمه
صعدن خواتك عالنوگ
باجر يدخلوهن سوگ
مثل الهوه ويه المخنوگ
.. هم مو بدينه
جا هو غير العباس
لا ينوصف لا ينقاس
گبل السهم تدري الناس
.. متروسه عينه
~~~~~
ما يرد خسران من يطيح عطره يگوم مثل الهيل
سوره من قرآن ما ينهان عالتعبان يمطر حيل
كلهم يعرفون لو شمسين من يغتاض يبدي الليل
السرعه مو مقياس شفنه هناك من الخوف ثگلت خيل
ثگلت الخيل عله الگاع ركض ما بيها
الرايه ترتاح اذا گام يهوس بيها
من السهم صاب جربته وتطشر مايه
گامت الناس عله الناس يطشر بيها
خط رجعه للدم خليت
بجفوفك ولا حسيت
صاحت رقيه اشتاگيت
.. يلما تجينه
جا هو غير العباس
لا ينوصف لا ينقاس
گبل السهم تدري الناس
.. متروسه عينه
~~~~~
من الخيم للماي صوت ازغار من بعيد عمي تصيح
من سمع بالصوت مدري شصار كلشي اندار حته الريح
ظل يصد عالجيش گام الراس من الخوف وحده يطيح
كلشي گام يخاف حته الماي صار الروج بي تسبيح
خايف الماي عله الماي يذب بروحه
جربه وشلون للخيام ترد مذبوحه
هنانه تشعر طعم بالوفه شمحلاته
كون الخوان للخوان ترد مذبوحه
تربية داحي البيبان
عطشان شابگ عطشان
تلاگينه دم بشريان
.. واحد مشينه
جا هو غير العباس
لا ينوصف لا ينقاس
گبل السهم تدري الناس
.. متروسه عينه
~~~~~~
يختلف عالناس عنده عيون ما تنشاف نار ونور
تعدل الميتين من يفوت جنه تگول نافخ صور
مثله يحصل وين ماي العين ظهر حسين بس مكسور
هو حي حسين والعباس گبل الناس جان يزور
من يسلم عالحسين يرد يطوفه
هيه الخوان للخوان تهم معروفه
رجع الماي عله الماي بعد ما ضاگه
وجه الحسين عله الماي طلع بجفوفه
خل شفته عليها فطور
خل ظهره محني ومكسور
المهم يرجع معذور
.. ويخف بجينه
جا هو غير العباس
لا ينوصف لا ينقاس
گبل السهم تدري الناس
.. متروسه عينه
~~~~~~~
يسوي جسمه تراب كون ام عون ما ينشاف ألها اخيال
بالمخيم خوف من يروح من يعود راحت بال
عمره عاش اعگال ويعرفون بس عالراس من ينشال
المعركه اعله الدين والعباس جان بهاي راس المال
رفعت الراس اذا سولفوا عن زوده
يشرب الغيم اذا صار عطش من جوده
دوروا رادوا السر شنو البرايه
عگدت ام البنين بفخر مشدوده
اكبر درس لليوفون
يتلگه السهام عيون
بحسين كلهم يدرون
.. باجر سفينه
جا هو غير العباس
لا ينوصف لا ينقاس
گبل السهم تدري الناس
.. متروسه عينه
°°°°°°°°°°°°°°°°°°°°°
رد مع اقتباس
