القصيدة: بيدي دفنت العشيره أداء: مسلم الوائلي
كلمات: وسام الشويلي
~~~~~
بعيوني شايل دمعه غريبه
عوفوا الملامه سمعوا المصيبه
گلبي جروحه جبيره
بيدي دفنت العشيره
مصيبه .. مصيبه
~~~~~~
حگه الما عرف جرحي يوجهلي الملامه
ويسأل عن سبب حزني وغياب الأبتسامه
شنهو اليفرحه الدافن عزازه
يبقه غريب الفاگد احبابه
عايش نعم بس عايش جنازه
شايل جرح عاشور ومصابه
كلهم جفوني خلوني وحدي
بين الشماته بس صبري عندي
گاضيها حيره اعله حيره
بيدي دفنت العشيره
مصيبه .. مصيبه
~~~~
يعگوب انعمت عينه اعله يوسف من نحيبه
وهو اليدري بي يرجع بعد قصته العجيبه
شم القميص وفتحت عينه
وصار ويه يوسف ذاك الملاگه
وانه قميص الأبو مگطعينه
وغصباً عليه احمل فراگه
ما انسه هظمي لمن دفنته
اي وصله وصله بيدي جمعته
لميته گوه بحصيره
بيدي دفنت العشيره
مصيبه .. مصيبه
~~~~~~
فاگدلي اخو غالي ولا واحد يشبهه
مضيع عم صدگ يسوه الگمر وشمحله وجهه
عندي اخت يا ناس حساسه
آ يا رقيه شلون انساها
والدها لمن عاينت راسه
شهگت ويمه الأجل وافاها
وانه گبلها عبد الله شفته
نبله جبيره صابت رگبته
گطعت رگبته الزغيره
بيدي دفنت العشيره
مصيبه .. مصيبه
~~~~~~
حگي من اون وابجي وحزن تخلص حياتي
گدامي يضربوهن ويشتموهن خواتي
شنهو اليريح گلبي المعذب
وهظم السبي ميروح من بالي
اعظم جرح سلبوا خدر زينب
ونضربت بسوط وعصي اگبالي
كلما شفتها اذكر هظمها
لمن اجوها وحرگوا خيمها
شايل مصيبة اسيره
بيدي دفنت العشيره
مصيبه .. مصيبه
~~~~
جرح الشام اشد واصعب تلگونه بهلاهل
صبيتهم يرامونه بحجر من المنازل
اطفال تبجي وانه عالناگه
والسلسله من رجلي حد راسي
وسمع رقيه تصيح مشتاگه
وينه الأبو وينه اعز ناسي
ما ينسه گلبي لوعة عذابه
من دخلونه وسط الخرابه
طرفي عليمن اديره
بيدي دفنت العشيره
مصيبه .. مصيبه
~~~~~
يالرايد سبب موتي والهموم الثگيله
انه اللي اخذ روحي سبي عمتي العقيله
هين السم اللي سره بجسمي
وهذا احسه ازغر جروحي
انه اعله زينب لوعتي وهظمي
السلب مخيمها سلب روحي
سوط آل اميه العذب متنها
هو الكتلني وحزاني منها
روحي عليها كسيره
بيدي دفنت العشيره
مصيبه .. مصيبه
رد مع اقتباس
