باسم الكربلائي
قصيدة : خزينا من النظر
للشاعر : مهيمن الفاطمي
: ليالي استشهاد الإمام السجاد (ع)
: ليلة 24 محرم 1446 هـ
موكب أخوة زينب - قاعة الشهيد القائد مهدي الكناني - بغداد


يا سهل قدم النحر
قَد خُزِينا امن النظر

يا سهل هذا آنه إبن المنذبح
بِيَّه ديره امن الألم فوق الشرح
ابهالدراهم حاجي شيال الرمح
نظرة الشامت على الخِدَّر جرح
كلبي بالحسره انفطر
قَد خُزِينا امن النظر

طلب آخر رايد الثوب اجمعه
يا سهل إكلت رقبتي الجامعه
شوف دمي السال من عدها او دعه
عاللي يشمت بالأسير او يفجعه
ما شفت بيهم بشر
قَد خُزِينا امن النظر

يا سهل سهله الرزايه والصعب
لو شفت عمتك أمامك تنضرب
او تشعر ابروحك توج نار الحرب
من خواتك أسره بديار الغرب
اشسوه بينه هالدهر
قَد خُزِينا امن النظر

إقره بعيوني المصايب يا سهل
كَالتُّرُك والروم رادونه نذل
مو مهم خل يطحن اعظامي الحبل
او لا وسط سوك الحقد يوكع طفل
خل يجي ابراسي الحجر
قَد خُزِينا امن النظر

مشهد اكبالي او عليه كلبي احترك
زحمه من تتصدق اعلينه الخلك
ابشجرة انفاسي كأن مات الورك
مدري باب الدنيا فوكاي انطبك
الموت بحساسي استقر
قَد خُزِينا امن النظر

بالخرابه اشلون منهم نحترس
او تلفح اوجوه النساوين الشمس
عالبشر مو جنه خيمه بالأمس
ابلا سقف شو تالي صرنه ننحبس
ثاري بيد المنتظر
قَد خُزِينا امن النظر