القصيدة: كلمة غريبه
أداء: مسلم الوائلي
كلمات: حسن الدراجي
~~~~~~
تاخذني غربه اعله الغرب
شرد انسه من ذاك الدرب
أسهل جرح كلش صعب
... جلمة غريبه
~~~~~~
من اتشوف اخوك بلايه هندام
أول ما يصير اگبالك الشام
جلمة خارجيه بنص الأحلام
من اسمعها اگعد وين ما انام
شماته وكربله .. وجروح العايله
من اميره مخدره .. سبيه معلعله
من خيمتي الذاك القصر
من كافلي الهزل الشمر
واليعصر بگلبي عصر
... جلمة غريبه
~~~~
وكت صارت جروحي كلها خوان
من عزي ودلالي الحرگ صيوان
من تموت اخوتك ياهو دفان
تعرف جرحي من تموت عطشان
بعد ذاك الضعن .. يغربني الزمن
تصير ام الخدر .. غريبه بلا وطن
من هيبتي الفوگ الهزل
هيبة علي بجفها الحبل
من تنسمع هم تنعقل
... جلمة غريبه
~~~~
من ذاك السبي البين الولايات
من طالت وگفتي اباب ساعات
من گالوا اجه ضعن الغريبات
صدگت بعلي ما عايش ومات
شفتهم باليسر .. يا طول العمر
گلت الروحي آه .. موتي ام الخدر
ذاك الحجي الما ينحجي
تراب العبي وهظم وبجي
شگد صيحوا بويه علي
... جلمة غريبه
~~~~~~~
كل شويه اناغي الراس الحسين
أختك وين جانت صارت الوين
من خيمتها طلعت للدواوين
ملگه الشام كبر عمري عمرين
هيه المشكله .. جنت مدللة
كسرتني كسر .. مصيبة كربله
بيها الذبح يوصل طفل
وجلمة أخو تكتل كتل
من يموت أخوك وتنسئل
... جلمة غريبه
~~~~~~
كلما تبجي تلگه السوط فوگاك
تندار اعله اخو بس محد وياك
لو تسألني گلبي شنهو الأذاك
من انته غريب وكلها تنخاك
من شوف اليتم .. وامك تنشتم
والغربه شكثر .. طاحتلك زلم
بس الخرايب والطبل
يضحكون من يبجي الطفل
يا گلبي أبد ما تنحمل
... جلمة غريبه
رد مع اقتباس
المشاركة الأصلية كتبت بواسطة تشيللو
