هنا

[أنثى حائرة]

السلام عليكم


اني كاعدة وي عيالي و داعاني من مشكلة سرقة عمتي و بناتها المتزوجات اغراضي ..من اروح لاهلي الكه اغراضي ماخوذ منهن بحجة يحركن كلبي بيهن هنه لا محتاجات و لا ما عندهم بس هيج خباثة ..يعني اني حامل حتى الادوية مال حمل اذا نسيت الكاهن ماخوذة ... تعبت منهن حاجيتهن اكثر من مرة ينكرن بحجة الغرفة مقفولة..ويصيحن نمونة شنو ما عندنا غرف ...كذلك حجيت وي رجلي طبعا مينطي باهله ذب الصوج كله بيه و يكلي انت ماخذتهن وتذبين التهمة بامي
صيروا بمكاني شسوي ..عمتي ما معتازة لان راتب عمي تقاعدي هي بيدها و عمي موجود وهو ياخذ المصرف منها .. راتبه مليون لهم فقط .. و رجلي دينطيها 500 الف من غير الادوية لهاو هم باعين كاع محصلين ب 170 مليون وفلوس بيدها هي تتصرف بكيفها

خليت كامرة بغرفتي ويمكن يطفن الكامرة ويبوكن على كوله ابو المثل حرامي البيت مينلزم ....اريد حل منكم تعبني كلش ما مخليات على حالي حال اغراضي كله زينة واصلية يحركن بدمي وانقهر

[Suzana]

والله اني اشوف اذا ميعزلج ببيت وحدج
فاطلكي احسن
او تعامليهم بالمثل،،صح مو تربيتج ولا اخلاقج بس شويه بردي گلبج بيهم
مو حياة هاي..

اني اترخص

[ȺӀì βąҍӀì]

وعليكم السلام

اولا شعجب متنقفل غرفتج لما تروحي لاهلج .
شغلة ثانية اكو كاميرات تخزن برام وتكون صغيرة كلش وحتى اكو كاميرات على شكل هولدر كلوب .. تحطيها بغرفتج وتنخزن برام من غير محد يشوفها .. واسعارها مناسبة تقريبا ٣٥ الف دينار وبهيج شيء
ما كو بعد عذر لزوجج ..

[دُعےـــآء]

مو تكولين زوجج ينطيها 500 يعني اموره تمام خل يشتري او يأجر بيت وطلعوا .. تره هيج عيشة ماتنراد وعلي شهلعبان النفس هذا ..

اهل الزوج الزينين هم نعمة ثاري ولازم نشكر الله عليهم

[ȺӀì βąҍӀì]

هذا رابط بيع كاميرا مخفية على شكل هولدر
https://www.facebook.com/share/p/kiw...ibextid=xfxF2i

هاي الطريقة راح تصير الج حجة ثابتة عليهم

[صقر عراقي]

مااعتقد كل شيء بقصتك مية مية صح وعدل .؟ولنفرض انها كماهي .؟
فممكن عندج حاله متشبه طبعهم مثل ..متعالية عليهم او متنمرة بطريقة
ولم تنطيهم مجال للمواجهه معك .
قد يكون انت شرسة شوية وصعبة ولهذا تشعرين حركاتهم مجرد يغيضوج
يعني مامحتاجين الشيء الذي ينسرق منج
فاعتقد اكثر الخطأ منج ولازم تراجعي نفسج وتغيري بطبعج وانزلي الى مستواهم اذا ترين نفسك اعلى منهم
وجربي . هذا الرأي استخرجته من لسانك
اعيالج مامحتاجين ويسرقون او يكسرون الرخيص من الحاجات بمعنى الضرب على الريش لاعلى العظم
غيري طبعك فترة من الزمن وجربي اعتقد سوف تلاقين وجوها اخرى وقلوبا تحتضنج وتنتهي القصة
وبالاخير يطلبون برائة الذمة منج وتسير الحياة للاجمل
بالتوفيق ان شاءالله

[Aabdullah]

كل البيوت الي تكون بيها عوائل كبيرة بيها مشاكل
وهذه المشاكل الي ذكرتيها بسيطة وما تستحق ان تكون مشكلة قد تسبب انفصالج عن زوجج ، الافضل بهذه المرحلة الصبر وخزن الحاجات المهمة بحقيبة او صندوق تقفليه اذا طلعتي خارج البيت او الغرفة
والخطوة الاهم شيليهم من بالج اعتبريهم اطفالج ويكسرون او يضيعون المكياج وحاجاتج الخاصة.. وصبري

مصيرج تكونين بيت وحدج فبهذه المرحلة اذا كنت تحبين زوجج تحملي اهله وتعاملي وياهم بالحسنى

عيونج وبالج ومشاعرج وافكارج شيليها من على فلوسهم وارباحهم لان هالشكل تأذين نفسج بدون ما تستفيدين شي
ومن راقب الناس مات هماً.

واخيرا.. اهم شي تصبرين عليهم
فمن صبر ظفر.

[الرميثي]

هذه المشكلة هي من مشاكل تعدد العوائل في بيت واحد
حلها في شطر العوائل كل عائلة في بيت
خاصة وانتي تقولين انه يعطي لامه بالشهر 500 الف
يعني من الناحية المادية متمكن وقادر على فتح بيت جديد
اطلبي منه بل اضغطي عليه لبيت جديد
والله الهادي لكل الناس