باسم الكربلائي
قصيدة : روحي بنوحي
للشاعر : حاتم صبري الكاظمي
: ليالي محرم الحرام
: ليلة 16 محرم 1446 هـ
: ديوان انصار الحسين (ع) البصرة - الجنينة
طور: #ظلت_بحيره #دهري_ذبني


روحي ... بنوحي
أمك وجيت بدفنتك يبني

امــك وادور إِعـليك ... و اِبـضـلع مـــــوجوع
عطشان بس مو ماي ... هاك اشرب الدمـــوع
أسأل علــــيك الـگاع ... والگلـــــــب مفـجوع
ما شفتي واحد طاح ... مهــشوم الضــــــلوع

ولكــــربله من جـيـــت ... مكسوره ضــلعين
يـــوليـــدي و أنـــده آه ... جسـمك وگع وين
من نحرك اسمع صوت ... يطلـــــع بالونـــين
فوگ الرمـح مــــرفوع ... ظل راس الحسين

روحي اعله گاع النوح ... شـاهِدَت وضعك
متــــــــگطع و يا ريت ... أگـــــدر أجمـعك
من نحــــــرك المذبوح ... تون يمّه اسمعك
روحي بركضــتي ليك ... عَـــثّرها اصبعك

تارِس ييمـــه الـــگاع ... بالدم أنـــُـــظرَك
ويه ابنك السجـــــاد ... حَضـَرِت گبــــرك
مرّه ابــچي مرّه بأيد ... أمـــسح ابنـحرَك
لو أجــــمع من الگاع ... كل عَظُم صـدرك

بمنــــــظرك يا مـذبوح ... صـــابتني حــــيره
مــــــتوســـده ويـــّاك ... كل العَـــــشــــــيره
أمشي وأشيل ضـلوع ... امهـــشمه و كسيره
ما حاسبه يحســـــين ... تشِيـــلَك حَـــصيره

و بــجـمر نــــار الـــروح ... ألـطم عله الـــراس
من حظني صرت اليوم ... بالخيــل تنـــداس
رحت وشفت عـــالماي ... جــــــــثّه بلا راس
أعـــرفته الـبلا چفــين ... هذا ابني عـــباس

يا جــــرح ماله ضــــماد ... يالصعبه اشلّك
ارجعت وشفت يحسين ... مدفونه أهــلك
عالصــــــدر من خلـيت ... عبد الله طفلك
روحــــي ادفنت ويـــاه ... بهالحاله اگــلّك