هنا

[فــــاطـــمــة]

على طَاري الموهبه .... عندي هواي مواهب بس ولا وحده طورتها ولا إستمريت بيها ... الرسم ، الخط ، الكتابه وهم چنت أكتب شعر بس مدري وين راح الدفتر الخاص بيه .... المهم حالياً ماعندي أي موهبه .... مرات اگل لأهلي إنتوا دِفنتوا مواهبي بسبب الدراسه .... ما طورتها أو ساعدتوني ....على گولة أبويه الهدف الأساسي بعدين الموهبه تگدرين تطوريها من تخلصين هالكلام صراحة ما خش عقلي بس إقتنعت بيه بنسبة 85% لان إذا طَورت موهبتي وهملت دراستي شنو النتيجه وجابها على حكم إنگليزي مدري شسمه يمكن هارورد هيچ شيء المهم چان دكتور ويحب يصير حكم أعتقد هيچ مضمون الكلام ما أتذكر بالضبط إي فشسمه كمل الطب مهنته الأساسيه وبعدها صار حكم .... يعني الزبده من الكلام كملي دراستچ وسوي اللي تردي من مواهب واحيي اللي دفناه.... وحالياً تخرجت ولا موهبه عندي كلهن إندفنن مدري اني أحس مدفونات

[فــــاطـــمــة]

وبنهاية هاليوم نگول....
الحمد لله على النعم التي اعتدناها ونسينا شكرها الحمد لله على اليوم الهادئ ... والمنزل الدافئ ... والأيام الآمنه ... والقلب المطمئن ... والضمير الحي

تصبحون على أشياء حلوه مثل گلوبكم وجمعه مباركه عليكم

[فــــاطـــمــة]

في الوقتِ الراهن أعتقد بأنَ كُوباً منَ الچاي كفيل بِتهدئة رأسي....

[فــــاطـــمــة]

على طاري الچاي خَل أسولفلكم حِكمه.....
مِن تسوي لأحد گلاص چاي وتسأله....
كَم خاشوگه شَكر أخليلك ؟
يگلك بكيفك وتصير إنتَ من كرمك تخلي خاشوگه
وإثنين ويمكِن ثلاثه وبحسن نيه ....
وبَعدين تتفاجئ انو من ضاگه ما عجبه
ومُمكن ما يكمله يخلي نص منه ما يشربه
.
.
بالضَبط نفس المبدأ بمعاملتك معَ الناس
لا تفرط بالعطاء والذوق گدام واحد ما يعرف قيمتك
لأن ما راح يفهم اللي جاي تقدمه إله....
لأن للأسَف ساعتها راح تِنفهم غلط
وبالعكس وتنلغي حقوقك....

عامل كل واحد على إدراكه وفهمه إلك
إنطي على گد اللي يبادلَك بيه من غير أي زياده
بَس إذا چان وياك زين مَره صير أحسن منه بمليون مره......
.
.
.
وحتى تنحَل قضية گلاص الچاي
إنطي الچاي أويا شَكر وهو يخلي حَسب مَيحب

[فــــاطـــمــة]

للأسَف بعض الأهالي المُقرفه هيچ تكون عقليتهم

إيعععععع هاي النماذج ماتنقرض

[فــــاطـــمــة]

تصبحون على ما تَتمنون

[فــــاطـــمــة]

يَكبر المرء على كُل شيء إلا على حاجتهِ الى أمهِ

[فــــاطـــمــة]

المرايا وعيون الناس بوجوه مُتغيره.....
أكو مرايه بغُرفتي من أباوع على وجهي بيها أشوف بَشرتي مو صافيه....
وبغُرفة أمي مرايه من أباوع على وجهي أضحك لأن أشوف وَجهي وبشَرتي صافيه وتجنن....
أروح لمرايه ثانيه أشوف وَجهي باهِت وعندي هالات جوه عيوني....
ومرايه بدراجة أخوي وَجهي بلا ملامِح بس كتلة تَعب بيه....
ومرايه بسيارة أبوي وَجهي مَغوش بيه....

بكِل مرايه ألگه وَجهي بشكِل يختلف..... ونظره تختلف..... وتساؤُلات تختلف..... يعني بكِل مرايه شكل وتَفصيل يختلف بحيث خَلتني أصفن إنو إحنه نفسنه منعرُف شكلنا الحقيقي شگد ما دققنا بالنظر وقَربنه من المرايه وغَيرنه ونظفنه بيها تُبقى أكو تفاصيل نِجهلها أو بعدنه مانُعرفها ....
وعيون الناس مثل المرايه

أمي : تشوفني أحلى وحده ومابيه ولا عيب
أبوي : يشوف رأيي كلِش مُقنع ويحترمَه كلِش يثق بيه و على گولته لو مَرجع أتبعها واني مغمض
أحد ثاني : يدزلي رِساله بكلام يأذي وهو مايعرُفني غير من مَنشور
صديقاتي : اللي تشوفني گلبي طَيب ونَقيه واللي تشوفني مُهمله واللي تشوفني بشخصيه قويه واللي تشوفني منطويه ومُعقده واللي تشوفني أحب الوحده ومو إجتماعيه......

وبكِل شَخص أقابله يشوفني شيء يختلف وحسب نظرته وصورته اللي يكونها يخلق رأيه
.
.
.
عيون الناس مثل المرايا ومو لازم نصدگ بكِل مرايه ونضل واگفين گبالها ونعدِل بنفسنه لَحد ما نصير حلوين بيها..... مَحد مسؤول عن الصوره اللي يشكلها الناس تِجاهه ومو ضروري يهتَم بيها وينطيها أكبر من قيمتها....... بس اللي يحبك يشوف أجمل إنعكاس إلك وبكل حالاتك

وبهالدنيا راح نشوف هواي مرايا ومو بالضَروره بكِل مرايه نوگف گبالها يحتاج البعض نجاهلها ونِكمل طريقنا........

[فــــاطـــمــة]

يَكبر المرء على كُل شيء إلا على حاجتهِ الى أمهِ

كبرت ... ولا زِلت أبحث في الزحام عن أمي ... وأعبر الطريق ويَدي بيد أمي ... وأهرَع إلى أمي حِين أخاف ... وألجأ لأمي حِين أحتار ... وأنطوي عند أمي حِين أحزن ...... يَكبر المرء إلا عن حاجتهِ لأمهِ

[فــــاطـــمــة]

گاعده أمر بفترات اللي أريد شيء وما أدري شنو هو ومَرات أريد أنام بَس أسهر لأن أحس أكو شيء أنتظره أو مِنتظرني بَس هم ما أعرُف شنو هو بالضبط ..... وباقيه هيچ لا اني العارفه ولا اني النايمه