استدعاء مريب
بقلمي عبير الياسمين
هذا واحد من مواضيعي القديمة اللي كتبتها منذ زمن بعيد ,
اني اعدت كتابتها لان ما كان عندي نسخة منها .
بعد تخرجي رجعت لفترة قصيرة للعراق واشتغلت اثنائها باحد الشركات الاجنبية , ومن ضمن كادر دائرة المهندس المقيم المشرفة على المشروع وكان هناك فني مصري واسمه عادل,
الاستاذ عادل كان انسان محترم وفني شاطر جدا وعنده خبرة وشاغول ,من كنا نطلب شغلة من واحد من جماعتنا يطلعون روحنا يلا يسووها , بس من كنا نطلبها من عادل كان يخلصها على الفور.
هو كان من النوع المرح ويحب يصنف وينكت على اشياء بسيطة مثل شفت المدير شنو كان لابساو شفتوا وزيرنا, صابغ شعره
. وعلى اشياء تصير بالدائرة اوخارجها ومن ها الحجي,
ويوم اجا عادل وهو متوتر؛ هو كان يعرف اني مو من النوع اللي يكتب تقارير كيدية او يروح ركض يوشي بالناس وواثق بي , قللي راح احجيلج فد شيء بس عفية لاتقولين لاحد لان اذا ماراح احجي راح اطك ,
قال دزولي استدعاء للدائرة الفلانية , لما وصلت ,دخلوني بغرفة جبيرة ما بيها غير كرسي ,درج خشب ,وشباك عالي قريب من السقف وبي بردة. الرجل اللي وصلني للغرفة قللي انتظر هنانة ,كعدت على الكرسي , مرت نص ساعة , ساعة, واحد اجا فتح الباب خنزر عليه وراح.
صار بي توتر , وقمت احجي ويا نفسي ؛ياربي اني شسويت هذولة شراح يسوون بي , وبعدين اقول لنفسي , لا هم اكيد ما راح يأذوني لان لو رادوا هيج كان اخذوني راسا من البيت ومحد عرف عني شيء, مرت ساعتين هم واحد طل من الباب وطبقها وراح , المرة صار بي كأبة!.
بعد ثلاث ساعات من الانتظار والتوتر والتعب,اخيرا دخل واحد طويل عريض وقللي شيل الدرج , شلتة , حطة على الحايط واصعد فوق اعلى الدرج نفذت الاوامر , قللي سد بردة الشباك
اني ماصدكت اذني ؛ سألته اروح !!!
قللي روح .
طبعا طلعت واني لازم نفسي حتى لا اركض ويشكون بي , ومن طلعت من الباب الرئيسي رد انزل وابوس الكاع بس خفت , طلعت للشارع العام واني امشي سريع ولما ابتعدت عن البناية ركبت اول تاكسي ورحت لبيتنا ولحد الان ما افتهمت ليش سوو وياية هيجي
احد منكم افتهم ؟
بقلمي عبير الياسمين
رد مع اقتباس
المشاركة الأصلية كتبت بواسطة وردة..
