شيعي شيوعي
يجوز يخطر على بالكم وتقولون هذا شلون حجي !! ماكو هيجي شي ,بس اني اكللكم لا اكو!! يعني قابل الشيعي ما عنده حق يكون اله انتماء سياسي معين ؟ يعني حتى لو يكون ملتزم بتعاليم المذهب ممكن يكون اله ايضا فكر سياسي .
راح احجيلكم عن واحد من اقربائي خللي اقول اسمه قحطان, قحطان كان شيعي بس ايضا متبني الفكر الشيوعي , المشكلة بقحطان انه كان يحجي هواية على الحكومة لذلك كان دائما مغضوب عليه وطبعا مو بس بالزمن الاغبر قبلها هم كان هيجي,
ولما يوصل الحجي للجهات الامنية ياخذوا الى دار الضيافةوهناك يقومون بواجب الضيافة على اكمل وجه ويتعاملون ويا بكرم وشهامة مثل تعاملهم ويا كل مواطن عراقي صالح يؤمن بالديموقراطية وحرية التعبير , ورا مدة يطلع وهو تعبان ومكسر من شدة حسن الضيافة, فياخذلة استراحة لاعب كرة القدم بي الشوطين
,,
وورا مدة ترجع ريمة لعادتها القديمة ويرجع يحجي ؛
هذا فلان ظالم وهذاك واحد ما عندة شرف , وعلان واحد مجرم وهاي طالعة تغنيلي بالتلفزيون اغاني وطنية انتي كذا ! ليش انتي شلج علاقة بالوطنية
طبعا اني لطفت الحجي لان ما اقدر اكتب الحجي نفسه .
ويرجعون ياخذوا لدار الضيافة هم طبعا يعرفون ان هذا الشخص ماعندة اي نشاط سياسي لا عام ولافي اي تنظيم سري من التنظيمات اللي تسعى لقلب النظام , لانهم عندهم بداخل كل حزب وتنظيم سري جواسيس ويعرفون زين منو هو وشنو من شيء لذلك ورا مدة كانوا يطلقون سراحه ,
هو ما كان متزوج وبطبيعة الحال ما عنده اطفال لذلك ماكان احد يسأل عنه حتى اخوانه كان من يختفي فترة يخافون يروحون يسألون عنه السلطات الامنية . بهذاك الوقت وين تقدر تروح تسال عن المختفي من اهلك ! بس كان من يطلع يساعدوا ماديا من بعيد ,
المهم قحطان قضى حياته بين بيته والمضيف , ولو اني سافرت للدراسة للخارج الا اني سمعت فيما بعد ان قحطان انتقل الى رحمة الله وهو بكل فخر واعتزاز شيعي شيوعي .
بقلمي عبير
ملاحظة لمشرف القسم : اني ماعرفت بأي قسم اقدر احط الموضوع ترددت بين القسم السياسي وقسم القصص ويجوز ان الموضوع حرج ولايصلح للمنتدى لذلك لكم الحرية الكاملة في نقله او حذفه تحياتي
رد مع اقتباس
المشاركة الأصلية كتبت بواسطة مہحہمہؤُد آلَعہرآقہي
