باسم الكربلائي
قصيدة : خيال اعوفك
للشاعر : السيد رفعت الصافي
: ليالي محرم الحرام
: ليلة 9 محرم 1446 هـ
:جامع وحسينية الرسول الاعظم - بغداد حي الإعلام


خيال أعوفك أعوفك أعوفك
عالگاع أشوفك أشوفك أشوفك
يمك ما ينبض شرياني
هذا انت الواگع لو آني

صوتك سمعته من طحت گتلك فدالك
عفتك على ظهر المهر شنهي الجرالك
ليش التراب أويه الدمه إمغطي جمالك
هاذي وصالي إمگطعه مدري وصالك
مهظوم .. ياعلي وينك
وبساع .. غمضت عينك
مسموع نحيبي نحيبي نحيبي
مجتول حبيبي حبيبي حبيبي
يا كلمه الظلت بلساني
هذا انت الواگع لو آني

هوه الأبو من دنيته شنهي اليريده
إكنوز الأرض ماتغني عن شوفة إوليده
هوه الفگد مثلك ولد شنهو اليفيده
رحت امن إديه او رجعتك صارت بعيده
ودموع .. يبني ما تكفي
حيران .. واصفگ إبجفي
ما اريد حياتي حياتي حياتي
والآن مماتي مماتي مماتي
طاحن رجليه أو ذرعاني
هذا انت الواگع لو آني

صدرك يبويه للقُبل مو للبواتر
ظهرك لأن إسمك علي اتطعنه الخناجر
يالوگعتك كسرة ظهر كسرة خواطر
يمك تمددت أو صحت وين الحوافر
شتريد .. منهو اليضمك
الگاع .. لو حظن أمك
يتراب جويته جويته جويته
لاماي سگيته سگيته سگيته
هالموقف حاير خلاني
هذا انت الواگع لو آني

يالفرگتك ساعة زمن وادري گصيره
لكن طويله إعله الأبو والحيره حيره
مو سهله بويه غيبتك كلش جبيره
بس للأسف من نلتقي عمتك أسيره
وشحال .. بينك أو بيني
وفراگ .. ساعه ياذيني
شيريد زماني زماني زماني
مكسور لگاني لگاني لگاني
يا شاعر يوصف أحزاني
هذا انت الواگع لو آني

يمك يبويه نومتي صارت طويله
خافت أموت و هالإجت إختي الأصيله
ردي يزينب للخيم إنتي العقيله
خدرج أعز من إولدي الماكو مثيله
لتشوف .. طولج الوادم
لحظات .. للخيم قادم
شمات عدانه عدانه عدانه
وعيون ورانه ورانه ورانه
متمدد يمك تلگاني
هذا انت الواگع لو آني

هذا إنت يا أجمل إبن عالغبره تغفه
رايد أفييلك لجن ما بيه وگفه
آه يالعطش شمسوي بي مو روحه ترفه
ميت أو عينه اعله النهر اي والله وسفه
عطشان .. ذابله إشفافه
يا ماي .. ميت إخلافه
إبريعان شبابك شبابك شبابك
ونعيش مصابك مصابك مصابك
انعاك إبهم لو تنعاني
هذا انت الواگع لو آني

بويه إنت أكثر من إبن يالكلشي انته
ليش امن أريدنك حجي تنطيني سكته
واليوم أنا أحتاجك هوه وانت گطعته
وكت الأريدنك ظهر ظهري كسرته
لتروح .. يا نظر يا ضي
لتروح .. يا هوه يا مي
مشكور يروحي يروحي يروحي
يضماد جروحي جروحي جروحي
ما أتنفس بس أحزاني
هذا انت الواگع لو آني

أمك يبويه مصيبتك ما تگدرلها
بالخيمه لسه تندعي حي ترجعلها
مكسورة الخاطر بقت وانته أملها
دم هامتك لو شافته الموت أرحملها
وتشوف .. يالولد راسك
وتعيش .. هيه بأنفاسك
وتصيح ييمه ييمه ييمه
والراس تلطمه تلطمه تلطمه
وتگلك يبني إشدراني
هذا انت الواگع لو آني