ـــــــــــــــــــــــــ ـــــــــــــــــــــــــ ـــ
القصيدة: لِولِيدي خَدَم
أداء:مُحمّد بَاقِر الخاقاني
كلمات:عَبَّاس الشبلَاوي
ـــــــــــــــــــــــــ ـــــــــــــــــــــــــ ــــــ
يَا الصرتوا لِولِيدي خَدَم
تقرون تنعون الخيم
بشروني بيكم منكسر
و يصيح ويلاه . . .
يا مَن حضرتوا لمأتمه
هايِ أنه أمه فاطمة
خلوني اشوفنكم دمع
عينوني بالآه . . .
أنسوا كلّ الينحچي
تعنيت ادوركم بچي
أنطوني بس هذا الشهر مهلة
لحسين مريود الدمع
أنعوه وخلوني استمع
و نوحي على ظامي النهر يحلى
وين الگلبه حَار و مَا برد نوحه ؟..
يواسيني على جروحه
وبس لابني يحاچیني
حچایه الما وراها اسمه عطش زايد
و ابني مي دمع رايد
عليمن يعطش حسيني
بدموع بخ مأتمه . . . بدموع رد عَالظما
مريود دمعك يهل . . . لضلوع ومهشمة
ويَلَاه حُسَينْ يُمَة . . . ويَلَاه حُسَينْ يُمَة
ـــــــــــــــــــــــــ ـــــــــــــــــــــــــ ـــــــــــــــ
يَلجاي و اسود ملبسك
بالأدب وَقِّر مجلسك
بكربلاء كسروا خاطره . . .
الما عدهم أداب
خليني اشوفك منكسر
حتى بحضورك أنجبر
حزنك اشوفه بالگلب
مو بس بالثياب
من راح للحومة وخطب
راموا بحجار العرب
و تجرح حُسَينْ ورحمته چلمة
من تلطم تذَكر له أُم
تعاين لإيدك باللطُم
و التسبگه ايده عبرته نعمة
أنه اليمك أمه و عَاين لايدي
شلون الطم على وليدي
و الطايح عمد بيتي

يجي مكسور للمجلس يگر عيني
يجبرني اليواسيني
و أسمي اليبچي تربيتي
مشكور يامن حضَر . . . مشكو گلبه انكسر
مظلوم و الگلبه حب . . .دستور ياخذ أثر
ويَلَاه حُسَينْ يُمَة . . . ويَلَاه حُسَينْ يُمَة
ـــــــــــــــــــــــــ ـــــــــــــــــــــــــ ـــــــــــــــ
من تحضر أنسه دنيتك
و أقرأ العطش من مهجتك
و اذكرني أُمِ و فاگدة
بالمجلس تنوح
المجلس سواده و حزني له
ثوبي لمصيبة كربلا
يا من على فراشه گعدت
بصحرا أبني مطروح
ويلاه أصيح ويَ القره
عطشان و تلچمة الثرى
من گلبي صحت بكربلا يُمَة
ويَاي صيح انه صحت
يَحسِيَنْ زِينَبْ من رحِت
وي غربة صارت راحله و حرمة
أنا بالباب أگعد بالحُسَينيَه
و أتاني اليگصد بنیَه
یبچیني الصفَت نيته
من يستعبر استعبر قبل گلبه
البرود بمجلسَك غٌربة
اليجيني محترگ ريته
تنعون و أنه استمع . . . تنعون و آلطم ضلع
يَحسِيَنْ شيعَه القروا يقرون و اجري الدمع
ويَلَاه حُسَينْ يُمَة . . . ويَلَاه حُسَينْ يُمَة
ـــــــــــــــــــــــــ ـــــــــــــــــــــــــ ـــــــــــــــ
من يخلى منكم موكبه
وحدي أرد متغربة
يَا من نعيتوا مصيبته
بالمدمع الحَار
وياكم أبچي و أندعي
بضلعي يرب أهل النعي
و اليخدم وياي وبچه
ترزقَه بالثار
أنخاه يربيكُم زلم
للثار ويَ المُنتقم
و حسِينِي مَا طفى بگلب جمرة
و الشَال سودة رايته . . .
باچر أفرح يمنته
و انطي له رايه لكربلاء حمرة
تربيه المجالس مني مكفوله
و الما يرضى گلوله . . .
الدمعة سگت داري
عالخيمة الفزع گلبه و بچَه لزينب
طهرَت طينته و ينحب
مو مثل الحرگ داري
للثار الكم علم . . . للثار جدم بجدم
و البيه موقف وفه يندار ماي لخيم
ويَلَاه حُسَينْ يُمَة . . . ويَلَاه حُسَينْ يُمَة
ـــــــــــــــــــــــــ ـــــــــــــــــــــــــ ـــــــــــــــ