هنا

[NAZ‌]

ـــــــــــــــــــــــــ ـــــــــــــــــــــــــ ــــــ
القَصيدة: يَا گلبي تِقوّىٰ بِ الوداع
أداء:مُحمّد بَاقِر الخَاقانيّ
كلمات: احَمد مَاجِد الكِلابي
ـــــــــــــــــــــــــ ـــــــــــــــــــــــــ ــــــ
يَا گلبي تِقوّىٰ بالوداع وواعِدني تِكابر؟
بَس ليلة إتحمّل الضياع لعيُون الحاير
خَليمشي بسلامة حِسين.. واطفيلك سَواد العِين
لعيُون الحاير.. لعيُون الحاير
ـــــــــــــــــــــــــ ـــــــــــــــــــــــــ ــــــ
إِنطيني كِلمة حِسين ناوي يِمشي لأبعد دِيرة عَنّي
حِچاية لا تِحچي يگلبي العافني وإلچان اخَذني
ولا تِضل بالضعن تِحسب آنه اگلّك ما حِسبني !
لتبيّن مَهضومة رِسومي
فُوگ الهم ما احمّله هِمومي.. يِموت !
ما احرجه بعِلتي وما األمّه
يا گلبي وخل نِلزم يَمّه.. السكوت
شيقرّر راح اگلّه صار.. مِن يِودّعني
شِد حيلك ضِم الإنكسار.. لو ما صَعّدني
إرحمني وإرحم مِودّعين.. واطفيلك سَواد العِين
لعيُون الحاير.. لعيُون الحاير
ـــــــــــــــــــــــــ ـــــــــــــــــــــــــ ــــــ
فِدوة قَوّيني يگلبي مِن اضل افرك بِ اديه
ولا تِضل تِعصرني يَمه لُو نِوىٰ يِسلّم عَليَّ
وإفرح شِما بيك افرح برُوحة سكينة ورُقية
خَلّي يروحنّ ويّ الوالد
يا گلبي آنه وِياهن واحد.. زَمان
چانن يا گلبي يِدارنّي
وحدة اكثر مِن وِحدة تِحبني.. بِحنان
بَارك عَ الرُوحة للخَوات.. وإِرحم تَعبانة
وافتر خَلّيني عَ البنات.. اسگي العَطشانة
اسگي عيُوني والماشين.. واطفيلك سَواد العِين
لعيُون الحاير.. لعيُون الحاير
ـــــــــــــــــــــــــ ـــــــــــــــــــــــــ ــــــ
اتطمّن وضِل بمچانك لِيش بين الحِجر تِفتر؟
سَاعة يم عمّاتي رايح وسَاعة يم المهد تعثر
حَسبة شِچم صُبح اظلم ويِرجع وياخذنا الاكبر
هَوّد وصّىٰ اعليه وِليده
للكُوفة يُوصّلني بِ ايده.. اخُوي
وحَاشه حِسين يغيّر رايه
ما يِخلف مِن ينطي حِچاية.. ابُوي
بَس هسّه لخاطر البتول.. جَزّيني وِداعه
خَليمشي وكِلشي لا تِگول.. كَابِر چم سَاعة
لا تِنشدني سافر وِين..واطفيلك سَواد العِين
لعيُون الحاير.. لعيُون الحاير
ـــــــــــــــــــــــــ ـــــــــــــــــــــــــ ــــــ
عُود وصّيتك يگلبي تالي ما تالي عِفتني
ورا النُوگ شبيك تِركض؟ والف طيحة طيّحتني
ارجع لصَدري دخيلك يا گلب مو تعّبتني !
بس خَليبعد ضَعن الوالد
عَاد براحه يموت الواحِد.. عذاب
وبِيني وبينك آخ فِراگه
شَل اجدامي رِكاض الناگة.. مُصاب
مجبورة لخاطر الحُسين.. للواقع اخَضع
يالحابِس ضيمي والوِنين.. مرخوص تِگطّع
شِما بِيّه احرگ مِن سنين.. واطفيلك سَواد العِين
لعيُون الحاير.. لعيُون الحاير
ـــــــــــــــــــــــــ ـــــــــــــــــــــــــ ــــــ
غَرّبوا اهل العوافي والدِوا تِطشّر گبالي
يَلّه خل ابچي اعله حالك وانتَ گوم ابچي اعله حَالي
ومُوت يَـ الكِلّك محنّة الدار مِن حسين خَالي
مَا ادري انحط بهالموقف
ناخيتك تِتچوّه وتِنزف.. غريب
يالتنبض مَوّتني ببيتي
ما اريد اهتم بعافيتي.. واطيب
يَا گلبي يذبح السكوت.. مِن غير عيونه
تِدگ المن يلّه هسه مُوت.. ما هِيَ ضعونه
دلّيني طريق البين.. واطفيلك سَواد العِين
لعيُون الحاير.. لعيُون الحاير
ـــــــــــــــــــــــــ ـــــــــــــــــــــــــ ــــــ

[ســـــجـــــودي ﹩ʝ☹]

شكرا لك

[NAZ‌]

نورت عيني