القصيدة: رسائل شوق
أداء: مسلم الوائلي
كلمات: علي الأكبر الغرابي
~~~~~
رسايل شوگ ..
مكتوبه من دمعاتي البخدي
رسايل شوگ ..
من الجواد الحضرت المهدي
يا أول وآخر أمل
جم مره مكتوب العجل
من الجواد الحضرت المهدي
من الجواد الحضرت المهدي
~~~~~~
أول كلمه بالمكتوب
سلام الگلبك المتعوب
تعال عيوني يالمحبوب
مشتاگات لعيونك
الك ياما رسايل شوگ
عله جناح الهوه المخنوگ
اوديها وعليك تلوگ
يمايل طولك شلونك
جم رساله وجم تعال وما اجيت
وانه ياما بنار المتانه انجويت
گمت ارسمك حلم شاعر
يمك ويقراله بيت
الف مرسال ..
بجنح الهوى من الغالي للغالي
الف مرسال ..
يالمهدي وديته ويرد خالي
والدمع سولف من نزل
جم مره مكتوب العجل
من الجواد الحضرت المهدي
من الجواد الحضرت المهدي
~~~
رايح بس اشوفك جاي
ما تنشاف وانته هواي
وانه ما بين هاي وهاي
حرت يالمهدي بالملگه
يالمصاحب ضوه النجمات
وجرح شابگ جرح مرات
وين بيا مكان اتبات
يالذابحتك الفرگه
يا ابو صالح يمته يم باب المراد
كون اشوف اتصيح يا جدي الجواد
وملتقانه يم ضريحي
ونلبس اثياب السواد
الك ضميت ..
يالمهدي من نتلاگه جم دمعه
الك ضميت ..
روحي وأوجها بحضرتك شمعه
يا گلب لفراگك حمل
جم مره مكتوب العجل
من الجواد الحضرت المهدي
من الجواد الحضرت المهدي
~~~~~
غربه الدنيه والمشوار
مثل خيط الشمع والنار
يبعد اليوجعني شصار
شو طولت بغيابك
يراي الكلمن بلا راي
انه العطشان اريدك ماي
تمد جفك عليه افياي
مثل امتانيه احبابك
هذا حالي وتنزل الدمعه بسؤال
مره وحده يمته اشوفك مو خيال
يا ابو صالح تعبتني
جلمة الوين وتعال
انه الضليت ..
مثل الغريب بديره مهجوره
انه الضليت ..
يرسم احلامه بدمعه مكسوره
وظل تارس عيوني الخجل
جم مره مكتوب العجل
من الجواد الحضرت المهدي
من الجواد الحضرت المهدي
~~~
عشت عالباجر ويا ريت
ونفس يدفع نفس ظليت
الجمال عيونك اشتاگيت
يمته اتكحل عيوني
ادگ يا باب حته ارتاح
يمن وجهك ضوه المصباح
اذا باجر هلالك لاح
يروح من التعب لوني
يا وجودي وكلشي بالدنيه سراب
ولليريدك انته من الله ثواب
هاك اخذني ومدلي جفك
ياكل بروحي الغياب
اريد ارتاح ..
تدري الهجر يذبح لياليه
اريد ارتاح ..
يلما تمر بحلامي مر بيه
الطيفك يبن خير العمل
جم مره مكتوب العجل
من الجواد الحضرت المهدي
من الجواد الحضرت المهدي
~~~~~
يجدي بأخر المرسال
ما ظل شي بعد ينگال
طحت بس من طحت شلال
وتبده من الهجر عمري
الجواد آل النبي شوديت
لا مكتوب لا مريت
رغم كل هذا اعذرك جيت
خلص يالمنتظر صبري
دمعه دمعه كاتب من الذكريات
والرسايل امنيه من الأمنيات
ونتظرتك مثل جمره
ودمعتي بعيني تبات
بقايا جروح ..
انه البقيت بهجرك امتاني
بقايا جروح ..
يالمهدي لو مريت تلگاني
والدمعه مشوار الأجل
جم مره مكتوب العجل
من الجواد الحضرت المهدي
من الجواد الحضرت المهدي
رد مع اقتباس