القصيدة: يوميه اسافر
أداء: مسلم الوائلي
كلمات: علي أكبر الغرابي
~~~~~~~
يوميه اسافر ..
من المدينه الذي طوى
يوميه اسافر ..
من جمكران النينوى
انه اليحلم يشوفك ولو طيف بخياله
انه اليسأل وتغرگ مكاتيبه بسؤاله
يوميه اسافر .. يوميه اسافر
~~~~
سولفلي هسه بيا وطن
وبيا سلف يا صحره
تضحك عيونك لو بعد
نفس العيون الحمره
ابيض رمش عينك صدگ
لو هذا لون الگمره
بعدك هلال بوگفتك
لو مختلف هالمره
يالمهدي يمته ..
تخلص محطات السفر
يالمهدي يمته ..
ما يجري بعيونك نهر
وجهك يمته عالعاشگ يشع نوره وجماله
انه اليسأل وتغرگ مكاتيبه بسؤاله
يوميه اسافر .. يوميه اسافر
~~~~~
يا يوم عيني بغيبتك
تكشخ بذيج الطلعه
يا جمعه اشوفك سيدي
واحسبها آخر جمعه
هذا انه بفراگك عشت
نار اعله خيط الشمعه
ويا دمعه تطفي المحترگ
يبن الحسن يا دمعه
نار انتظارك ..
يلما ترد من سفرتك
نار انتظارك ..
ما تطفي إلا بشوفتك
وانه الينتظر منك ولو جلمه برساله
انه اليسأل وتغرگ مكاتيبه بسؤاله
يوميه اسافر .. يوميه اسافر
~~~~~
يا ساعه احضه بشوفتك
وتضحك عيون ايامي
يا يوم من بير الهجر
ينترس دلو احلامي
يا مره من ماي العشگ
اشرب وما ارد ضامي
يا لحظه واقع مو حلم
تطلع صدگ گدامي
دليني وينك ..
ما عندي لفراگك گلب
دليني وينك ..
حته ارسم الخطوه بدرب
انه الما يجي غيرك يمولاي اعله باله
انه اليسأل وتغرگ مكاتيبه بسؤاله
يوميه اسافر .. يوميه اسافر
~~~~
ها ما يجي وهسه يجي
يتزاحمن بضنوني
ويا باب الحسين شكثر
شديت بيهه عيوني
مثل الخريف وصفنته
صافن وذابل لوني
ويوميه افك باب الدمع
حد ما هلي يلوموني
كل مغربيه ..
بنيران المتانه احترگ
كل مغربيه ..
يالمهدي بدموعي اختنگ
ياهو اليفتهم دمعي اذا دمعي حجاله
انه اليسأل وتغرگ مكاتيبه بسؤاله
يوميه اسافر .. يوميه اسافر
~~~~
يوميه يم شاطي الأمل
يالمهدي جفي يرسمك
واكتب عله اوراق الشجر
كل حرف من ذاك اسمك
وبحلامي حالف لو تمر
تركض عيوني تضمك
وما اموت لو شح الهوه
ما دام باقي اشتمك
امنيتي وحده ..
يالعايش الغربه وطن
امنيتي وحده ..
بس شوفتك يبن الحسن
انه الضايع بهجره ولا واحد بقاله
انه اليسأل وتغرگ مكاتيبه بسؤاله
يوميه اسافر .. يوميه اسافر
رد مع اقتباس