القصيدة: حيدر راح
أداء: مسلم الوائلي
كلمات: علي أكبر الغرابي
~~~~~
طولي ويه طولك ذاب طاح وتبده
فك عينك اعله ام عون بس مره وحده
بويه .. ها يمبجيني
بويه .. اگعد حاجيني
بس مره وحده
بس مره وحده
~~~~
بنفس الحلم ظليت
عالباجر وياريت
ويم نعشك اتبديت
.. انه ودمعتي
ومن شالوا التابوت
ما ظل بعد كل صوت
منها وعرفت الموت
.. بايگ ضحكتي
ومن شفت النعش ماخذ مكاني
من عدها وعرفت الموت اجاني
وانه بهل وضع متت يحيدر
وبين دموعي ودموع اليتامه
ما لحگت اگلك بالسلامه
وبهذا الوضع متت يحيدر
يل بالنعش خلوك خليني يمك
كلما يهزني الشوگ بجروحي اضمك
بويه .. يا بعد سنيني
بويه .. اگعد حاجيني
بس مره وحده
بس مره وحده
~~~
من وگفتي اعله الباب
من عيني للمحراب
زينب جرح ما طاب
.. لسه بغيابك
هاي انه بويه ام عون
ما بيها روح ولون
الما عدها حته عيون
.. تبجي المصابك
يا دمعه البقت خاطر اهلها
وما شبعانه عيني بشوف اهلها
وانه المن زغر صرت يتيمه
مو زينب هذيج الهاشميه
ظلت بس ملامح زينبيه
وانه المن زغر صرت يتيمه
مو ذيجه زينب راح كلشي برحيلك
ما اريد اعاتب خاف اجرح دليلك
بويه .. هجرك ياذيني
بويه .. اگعد حاجيني
بس مره وحده
بس مره وحده
~~~~~
گالولي حيدر راح
من عيني مدري شطاح
شصبر بعد ورتاح
.. يا ابو الحميه
انه العشت جرحين
انه المتت مرتين
ما بينك وما بين
.. امي الزجيه
انه المحد احتارت مثلها
عاشت مدري ماتت وي اهلها
وانه بكل وكت صرت غريبه
من جرح الجرح ليليه اسافر
وكسر خاطر الما عنده خاطر
وانه بكل وكت صرت غريبه
گبل المنيه وياك جنت الحبيبه
من هسه راح يصير اسمي الغريبه
بويه .. بغربه تخليني
بويه .. اگعد حاجيني
بس مره وحده
بس مره وحده
~~~
يا عيد إلي بهل الحال
وانه بدمع شلال
ما اريده بويه هلال
.. عيد الله باجر
عيدي من اشوفك جاي
جفك عليه افياي
صحره واريدك ماي
.. تروي المشاعر
يا عيد الله باجر ما اريده
شلي بعيدي وعيونك بعيده
واتأمل ترد حلم إليه
انه الماتت وما شيعوها
وما دفنوها من دفنوا ابوها
واتأمل ترد حلم إليه
عطشانه روحي عليك من هسه جنها
ومن هسه راح اتعيش عاليوجعنها
بويه .. اگعد وأرويني
بويه .. اگعد حاجيني
بس مره وحده
بس مره وحده
~~~
يلما خذتني وياك
وذاك الترب ضماك
احلم ترد ولگاك
.. هاي امنياتي
لمسامرك حنيت
لنفاسك اشتاگيت
وما ظل بعد بالبيت
.. بس ذكرياتي
وبين الما تجي وباجر تجيني
مشدوده بأمل يوميه عيني
وانه بهل الأمل عشت وكابر
وكلما تعرض احلامي بخيالي
غالي وادري ما ينساله غالي
وانه بهل الأمل عشت وكابر
من هسه يا ابو تراب دلالي حاير
لا تبقه بيك وياي ولا بيه اسافر
بويه .. والحيره بعيني
بويه .. اگعد حاجيني
بس مره وحده
بس مره وحده
رد مع اقتباس