القصيدة: لبيك راعي الثار
أداء: مسلم الوائلي
~~~
يا جمعه التجمعنه وتشهر فقارك
يالمهدي ويا ساعه اتناديك انصارك
گلب اليريدك نار
لبيك راعي الثار
~~~~
كلما حلم ملگاك يتبده بالعين
اركض ودور عليك يم باب الحسين
نار الجفه وملگاك يالمهدي نارين
تدري الگلب مولاي ما يحمل اثنين
يبو جف الدافي من هجرك كافي
اركضلك حافي لو شفتك جاي
كل واحد يرسملك يالمهدي اشواگه
وانه ادري اعله احبابك روحك مشتاگه
بس للعشگ اسرار
لبيك راعي الثار
~~~
يا رايح ويا راد حفظتني الدروب
يتشابه بملگاك وجهي ويه الغروب
يوميه الك مرسال من دمعي مكتوب
يا يوسف الزهراء ما بينه يعگوب
يالذابل لونك بالغربه شلونك
يا يوم عيونك تضحك مولاي
يا يوم اعله عيونك تتبده عيوني
يا يوم بنظراتك يتغير لوني
صوت المدامع صار
لبيك راعي الثار
~~~~~~
سفره العمر والليل يخلص مواعيد
مو بالوجه بالروح طلعت تجاعيد
بالعيد إلي بفرگاك ما ينحسب عيد
آخ بوجعها الروح ما تقبل تهيد
يالمهدي احلامي تطلع گدامي
وركضلك ضامي واروه بملگاك
جم دمعه وجم جمعه بهجرك محسوبه
جم عاشگ عالفرگه وعالحب مكتوبه
مهما الزمان اندار
لبيك راعي الثار
~~~~~~
يالمهدي هاي الروح هجرك گضاها
مو من وجعها تلوج من مستحاها
يبست ومامش غيم يگطع ضماها
يوم التشوفك جاي تمطر سماها
يا يوم انشوفك نركض ونطوفك
وتشيل جفوفك وتصيح الثار
يا يوم الثاراتك مرفوعه الرايه
دمعات الينتظرك يالمهدي ولايه
جار الزمن ما جار
لبيك راعي الثار
~~~
كون الوجع يندار يالمهدي بيه
حته اعرف شياذيك كل مغربيه
هلبت ملامح طيف مو إلا جيه
حته اكشخ وينگال سير عليه
يا روح الزهره ياليذبح هجره
رايد بس نظره بحلامي وياك
يالمهدي وكل عاشگ يتأمل نظره
يالشايل بعيونك نظرات الزهره
بالملگه صدرك حار
لبيك راعي الثار
رد مع اقتباس