القصيدة: منين اجيب اخبار
أداء: مسلم الوائلي
كلمات: حيدر سامي السعدي
~~~~~
منين اخذ اخبار علي منين يگلبي احجيلي
بس انه بالدار واحس ايد حزن توميلي
شو رفت العين
شصاير لبو حسين
.. يگلبي احجيلي
.. يگلبي احجيلي
~~~~
خلت داره وخله وجهي
وبده يثگل النفس تعبي
گبل ليسد وراه الباب
اجه الخوف ودخل گلبي
شگد ردت اصيحن بويه بس ما ادري شيسكتني
الحيطان احس هدت عليه واحجيها ما خلتني
لو عايشه امي فاطمه جا صاحته وعانتني
شيلتها لو تحجي حجت شگد طلعته بجتني
وين امي وتشوف گلب زينب شگد خايف
جا صاحته وين يبو حسين وراك شعايف
ما سمعت الوين
شصاير لبو حسين
.. يگلبي احجيلي
.. يگلبي احجيلي
~~~~~
گبل ساعه شفت عينه
توادع كلشي وتسالم
تكض بحزامه احسها الباب
طفل بثياب ابوه لازم
الباب ما عدها گلب وتمنعه من جروحه
جا زينب الكلها گلب شتگول عن هالروحه
مو حرب راحلها لجن جاي احس سيف يلوحه
وذيج المهابه اترد إلي بشيباتها مجروحه
وين الحسن وين الحسين منو يحاجيني
وينك يعباس تره الخوف سبي مراويني
گالولي جايين
شصاير لبو حسين
.. يگلبي احجيلي
.. يگلبي احجيلي
~~~~~~
يگلبي اسكت اجوك اهلك
يحب لا تگطر أرد اسمع
هلي وصلوا احس بيهم
سمعت بالباب جف يدفع
لا هايه مو مشيت علي لا هاي ما معقوله
مو توه جان اعله الگلب يمشي شحلاته بطوله
عمامتمن بجف الحسن دم تنزف ومشيوله
وشلون ابو الهيبه علي رد ولده اليتجوله
لا لا حلم هاذ منو يفزز الما غافيه
شبي والدي شبي مشه بخير واجه بلا عافيه
حاجيني يحسين
شصاير لبو حسين
.. يگلبي احجيلي
.. يگلبي احجيلي
~~~~~
انه متعوده يم الباب
لأمي اشعل شمع مآتم
وگبل شمس الله اطفيهن
وهالمره انطفن بالدم
گطر عليهن دم علي وخط العذاب بدربه
والضربه البراسه اجت وصلت مجاني بگلبه
يا حزن اشد من هالحزن هاي المصيبه الصعبه
ألمن اتاني كربله جا هيه هاي الغربه
اندارت بالگلوب طبرتك يبويه اندارت
ويا زينب بخير بعد هالمصيبه الصارت
من صدمة البين
شصاير لبو حسين
.. يگلبي احجيلي
.. يگلبي احجيلي
~~~
عليه الدنيه خلها اتدور
علي مات شبعد عدها
وبس انه المره التنگال
عليها الله اليساعدها
الليله علي وباجر حسن والجاي اساس الرايح
باجر ضعن هاشم دمع من داره يطلع نازح
باجر اخوتي اعله الثره طايح يشابگ طايح
وهاي المعزه والخدر باجر بهزله اتصابح
لابد يجي يوم واطب شام سبي وجنازه
وبكل الأيام لبو حسين جبيره العازه
طبرة علي دين
شصاير لبو حسين
.. يگلبي احجيلي
.. يگلبي احجيلي
رد مع اقتباس