ابوذيات من اول محرم الى اخر محرم :
١- خروج الامام الحسين ع من المدينة :
بلطف الله على العالم علينه واشوف امبيته النيه علينه
يخويه الوادم الخانت علينه شيمتهم غدر يبن الزجيه
****
يريت تشوفني بعينك وتارة أهروش الكلب مكطوعه وتاره
افكر بيك يبن امي وتاره يهل دمعي ويشمت اعداي بيه
****
يهل تنشد علينه بليل شلنه وغير التعب من هالوكت شلنه
عمت عين الزمان شلون شلنه وصارت شوفتك حسره عليه
*****
طلع ظعن الاخوه بليل راحات
وبكت تطحن حزن بحشاي راحات
ابيوم الحملو ما شفت راحات كمت والكاع خويه ادور بيه
****
٢- العليلة تودع ابيها ع :
بعد عني الضعن وتراب ضلعاي
وابد ما طبك جفني عليك ضلعاي
احس كلبي انكسر وانكسر ظلعاي
مثل ظلع البتول الهاشمية
***
ولا مكتوب من عدكم وفاني
واضل للموت وياكم وفاني
يبويه العمر هل كاضي وفاني
عدل بس شوفتك حسره عليه
*****
٣- مسير الامام نحو كربلاء :
ريتك ياشهر ما تهل هليت
تراب البين بيدك جبت هليت
يدمع العين غصبا علي هليت
المصاب حسين يوم الضل رميه
******
عشك حسين كلبي من يهل بيه
بشهر عاشور حزني من يهل بيه
اودمعي عليه من دم من يهل بيه
اواسي الطاح وجفوفه رميه
****
٤- علي الاكبر ع :
وحك رب العرش بالكون لاله
اشكثر كلبي ييمه عليك لاله
الك جيه بعد بالبيت لا له
لو رايح بعد متعود اليه
****
شب الظيم من جدمي لهاماي
روحي تعالج وما صح لهاماي
راح الينحب ويبجي لهاماي
خذه مني الدهر غصبا عليه
******
٥- القاسم بن الحسن ع:
روحي فركتك يمه تسلها
وعليكم دمه من عيوني تسلها
شتكول امك اذا وحده تسلها
أكول ابني طلع ما رد عليه
******
يدنيه ابشكوتي وبواي حسي
وعن وجهي غبار الظيم حسي
اريد ابجي واصيح بعلو حسي
متى تحسين يادنياي بيه
*****
٦-الانصار :
الدهر كوه خذ احبابي وجرها
واحس بحشاي نيرانه وجرها
عليهم اجذب الونه واجرها
اشو غفله مشو من بين اديه
***
٧ - الامام العباس ع :
ابوجودك ما ادنك يوم هاماي
ولا شفت السراب وكلت هاماي
الغيرك ما شكيت الحال هاماي
اخوي انت والك منه عليه
******
بيوم العاشر العباس ضلعين
وبس هوه لعد حسين ضلعين
من بيت الرساله انكسر ضلعين
ضلع حسين وامه الهاشمية
*****
الشجاعه البيك من ربك وجودك
ونور البيك يا خويه وجودك
بحقدهم صوبو جبدك وجودك
طحت وتشمتو عدواني بيه
******
يخويه من اذكر ايامك واعدهن
وانا ايامي كرب تدري وعدهن
ام كلثوم وسكينه وعدهن
يشربن ماي كوه اعلى ال اميه
***
٨ - الامام الحسين يطلب الماء لعبد الله الرضيع ع :
روحي من الزغر بالمهد مايت
ويهل دمعي عليك دموم مايت
بيوم الشال طفله حسين مايت
ابنبلة حرمله البيها المنية
*****
راواني زماني اشكال ولوان
وعلمني على الحسرات ولوان
انحلت وهروش كلبي املحن ولوان
واحس نيران هجرك سرت بيه
******
٩- وداع الامام الحسين ع لعياله واطفاله :
وحق الله فلا تنسام بالدر
تغذيت وربيت وياك بالدر
هضيمه تعوفني يالحيد بالدار
واروحن من بعد عينك سبيه
****
١٠- استشهاد الامام الحسين ع :
وحك الطاعته الوادم والاملاك
ساري الحزن وبكلبي والاملاك
وحك من جمع اوصالك والاملاك
انحلت من ظيم فركاكم عليه
****
الكلب من طاح ابو اليمه وراحن
وعليه هلن دمه عيوني وراحن
ياحيف النسه انسلبن وراحن
وخذوهن عالهزل لبن الدعيه
*****
عسى عاشور لابين ولاهل
الفواطم بكن لا خيمه ولاهل
دمعي عليك لا بين ولا هل
اخاف اعداك تشمت خويه بيه
******
١١- لوعة العيال ليلة الحادي عشر :
تمنيت ليل هدعش ما جن
الحرم مثل السفن بالبحر ماجن
عفى عكلي يخويه عليك ماجن
مشيت وي العده وعفتك رميه
*****
الحزن ظل ياكل بكلبي ويلهام
شريك اصبحت من بعدك ويلهام
اريد اكصد ديار اهلي ويلهام
وخلي الدار كبلي تنوح هيه
****
بديت اصفك على الطيبين راحات
شعجب تالي العمر ما تصح راحات
عفاني اصبر واليه اخوان راحات
؟*******
١٢- عائلة الحسين ع على النياق الهزل :
العدو يا خويه عالحومه مراني
بسوطه يضرب اطفالي مراني
صحيح اكباله مو زلمه مراني
لجن غيرة علي وعباس بيه
****
طلع ظعن الاخوة بليل وسرى
وشب وسط الكلب كانون وسرى
يخوية مجتفين اليوم وسرى
على النوك الهزل مجتوفه ادية
****
الحزن خيم علينه ليل ونهار
الصبر خلص وسورة انهدم ونهار
هضيمه انا انضرب بالسوط وانهار
اخت عباس وامشي انا سبية
**
رد مع اقتباس
