طلع بضعنه الغريب وعرج بحسرة ونحيب

على قبر ام الحسن...

خله خده اعله الضريح وينعى ودموعه تصيح

لا امان لهل الزمن


يمه...وانا رايح ولطف كربلا نيتي

ماخذ كل اهل بيتي ادري تدور الايام

يمه...وانا رايح رفعي جفج ادعيلي

من اوگع اشد حيلي وانهض واحمي الاخيام

ييمه وجاي اودعج خاف مارد للمدينه اردود

ادعيلي بظهر عاشور ماطيح وي ماي الجود

اخاف مدللاتتي تضيع ويعيشن ليالي السود

ضعن مجبل اعله ديره...اهلها تحزمت ضده

ضعن سيد العشيره نازح عن وطن جده

.................................................. ....

منكسر ضعن الدلال ونزل دموع الجمال

صاح ابو اليمه بقهر!!

يمه عنح راح اروح لكربلا عين الجروح

وغربة الماله ظهر!!

يمه....والي بيها حيره تعطش عيوني

وطيحه تغرب ضعوني وانا موسد الگاع

يمه والي بيها صوت وركضه لعضيدي

گوم انهض يحيل ايدي والگه حسينك الضاع

ضاگت يمه واحتاريت اروح بهل الضعن لاوين؟

ماكو ديره بيها نعيش كلها بدمنه تطلب دين

باجر راح كلها تصيح اطلعوهن خوات حسين

ضعن حايره بمصيره..كل خطوه جرح عنده

ضعن سيد العشيره نازح عن وطن جده

.................................................. ....

رحلة تجرح كل ضمير حزن ابو اليمه الجبير

رايح لديره عطش!!

تسلبة جفوف الحرام وضعنه يبقى بلا خيام

وينسببي فجر هدعش!!

يمه...يگلها وينج فتحي گبرج اخذيني

صعب انظر صواويني الظهر تاكلهن النار

يمه....يكلها وينج الهجير ينشف اللهاتي

واصد ركضه عزيزاتي وحدرهن شوك وحجار

ييمه اخذيني يمج ريت من ضيم الزمان ارتاح

بالطف لو وساده اتراب لو اغفى اعله سن ارماح

وبناتي من انذبح ع النوگ يضعن بيهن الذباح

ضعن بت علي الاميره يضل لوحده شده

ضعن سيد العشيره نازح عن وطن جده

.................................................. ....

راحل وحزنه متاع ومن تناهيد الوداع

وهو محني اعله القبر!!

كلها باجر بالطفوف غربتي فگد الجفوف

وع الصواوين انكسر

يمه...عگب اخوتي احير بروحي وخيامي

واحس يموتن اجدامي لان مايمي عباس

يمه....عگب اخوتي التشمت بيه عدواني

واحس دموعي برداني واصيرن ابيض الراس

واطيح من المهر والگوم تحرگ للخدر صيوان

عنج راح اروحن شاب واموت مشيب وحزنان

عنج راح اروح اسمي الحسين وباجر العطشان


ضعن رحلته الاخيره بدمع مسبيه يتبدل


ضعن سيد العشيره نازح عن وطن جده

.................................................. ....

الملا: محمد باقر الخاقاني
الشاعر: احمد الهلباوي
اسم. القصيده: طلع بضعنه الغريب