اتمنى اكتبك بس عِشكَ
وانسى العطش وانسى الجرح
بيت القصيدة الينكتب
يطلع مثل وجهك سمح
بس ابوسط هذا الحچي
يعرضلي راسك ع الرمح
اكتبلي بيت اولو كمل
بالثاني لازم تنذيبح
لازم تظل ابلا نعش
وتموت گوه من العطش
يا ابا عبدالله
يا ابا عبدالله
نفرض كتبتك مبتسم
بس الصدگ ماتنعقل
شمس الله اكض لو طيحتك
لو ظهرك الما ينعدل
لو باليسر حرمه وطفل
وبصفها هم حرمه وطفل
خاطر يطيحهم سوه
چتفهم ابنفس الحبل
ذاك الركض ذاكَ انسحگ
والظل بالخيام احترگ
جروحك ولا يتشابهن
يتشابهن بس بالنـزف
جرح السهم گد السهم
جرح الرمح كلش كلف
ذن وبعد سيف وبعد
خيل وبعد سبعين الف
بس الحوافر مو جرح
لا هم جرح بس منخسف
شتفيدك وروحك گضت
جرح بجرح گالوا تشد
هلبت تشيل ايدك ردت
وخر الطفل لا ينمرد
يالميت وصاحوا بعد
لحد يضم سيفه ويرد
الله اكبر ياعلي
الله الاحد ياعلي
ع الميت الوادم تهد
يتنافسون اعله الذبح
ياهو اليسوي اكبر جرح
عيش ابكثر ماسولفوا
حس ابطعم هذا العِشگ
مو ظلمه هيه وتندفن
والزهره مامك تنسفك
سحگوا لحد ماهوسوا
تريد الصدگ هذا الصدگ
بالخيمة مو بس العبي
حتى الحرم شبعت حرگ
تعرف خواتك ياشهم
توجعهن عيون الزلم
يا اباعبدالله
يا اباعبدالله
_____________
للشاعر - حمزة الحسناوي
كتابة - zhra
MP3
رد مع اقتباس
المشاركة الأصلية كتبت بواسطة NaDeR2024
