ينازع بالوداع حسين جن ميت وي عياله
شما يمشي لخطوة يدير عينه لصيحة اطفاله
يصعد مهرته وينزل حيره وحالته حاله
ضل كلما يريد يروح بناته يجرن ذياله
اشوفه مدنگ ومهظوم مامش زلمه يبراله
من گد ماوحيد حسين ضل يحشم خياله
حيرة وخطوته صارت ثگيله وعينه حمره!
ضل اگبالي يتلفت لجن شاف خالي ظهره!
المدلل محد ويا... ...المدلل
الخطوة مقتل من مشه حسين
انا ع التل ساده العين...انا ع التل
الخطوة مقتل من مشه حسين..الخطوه مقتل
.................................................. .......
ساكت والوداع صياح ويسولف بذرعانه
مابي للحجي كل حيل بلهاته مجلب اللسانه
اشوفه يريد بس يروح مايتعطل ويانا
يخاف الوادم يگولون يفزع جاي نسوانه
يگلي زينب اخذيهن واخذتهن للخيم انا
رديت ولگيت حسين بس دموعه بمجانه
راح وضيعت طولة مشه بعيد وبيه خوفه
صار بعيني بس التل اركضتله حتى اشوفه
انا شندل غير هالتل...انا شندل؟!
الخطوة مقتل من مشه حسين
انا ع التل ساده العين...انا ع التل
الخطوة مقتل من مشه حسين..الخطوه مقتل
.................................................. .......
اشوف بعين اخوي حسين كوه تكاون ايدينه
يريد يجر نفس والناس من كل جهه محوطينه
اشوفه يحمل اعله الگوم وعيونه لصواوين
شويه شويه اشوفه ايميل ويضعف حيل رجلينه
اعاين صار رمي احجار كلهن فوك ابو سكينه
لن وحده من الحجارات طبكت حاجبه بعينه
فاض الدم على عيونه واشوفه بحيره صعبه
اشوفه بثوبه يمسح دم جبينه ضاع دربه
ماترجى من الحجر...ماترجى
الخطوة مقتل من مشه حسين
انا ع التل ساده العين...انا ع التل
الخطوة مقتل من مشه حسين..الخطوه مقتل
.................................................. .......
ضل يمسح بثوبه يريد يشوف بحومته دربه
كلها تگربتله وطاح سهم مثلث بگلبه
من السهم ثوب حسين ضل ملتف على الرگبه
بهاي عيوني شفته احتار من حسن بيهم بگربه
تولوا بالسهام وطاح صارت گومته صعبه
وراها صرت اشوف حسين الرايح واليجي يضربه
يشيل بروحه ويطيحوا ولـنه فرق خمسه
وحيد وفوگه الف زلمه شيضل بي انگطع نفسه
عن شسئل وادري بي ضاع...عنه شسئل
الخطوة مقتل من مشه حسين
انا ع التل ساده العين...انا ع التل
الخطوة مقتل من مشه حسين..الخطوه مقتل
.................................................. .......
خوية ان كنت حياً كوم صحته وريت ماصحته
ثلث مرات گام طاح على سهامه المثگلته
انا ردته لجن والله يزحف ليه ماردته
ضل يلوج ع التربان وعيونه اعله طايفته
ساعه ولن اعاين خيل اجت والجفن غمضته
فتحت عيوني شفت حسين عشر خيول ساحگته
الحوافر جابت يمي ولگيته ماله كل حيل
الماجان بزحف. يگدر يجيني جابته الخيل
شگد توسل گلبي بالخيل ...شگد توسل
الخطوة مقتل من مشه حسين
انا ع التل ساده العين...انا ع التل
الخطوة مقتل من مشه حسين..الخطوه مقتل
.................................................. .......
ضل اگبالي اخويه حسين وعيوني برجه تنظرة
ردلي اثيابه مسلوبات واصابع ايده مو عشره
يحاجيني بضعيف الصوت يزينب فري بالصحرى
ومنها لن اجه الذباح وتربع على صدره
يجر بلحيته ويضحك وينج يمه يالزهره
يضل يعلل بگلبي وعلى كيفه يحز نحره
الشمر برمحه يدفعني واگله لا تذبحه
كدامي كطع راسه وغفى حسين فوگ رمحه
كلشي ماضل راح خدري...كلشي ماضل
الخطوة مقتل من مشه حسين
انا ع التل ساده العين...انا ع التل
الخطوة مقتل من مشه حسين..الخطوه مقتل
.................................................. .......
الملا: علاء الغريباوي
الشاعر: حيدر سامي الكعبي
اسم القصيدة: الخطوة مقتل
رد مع اقتباس
