انكسر گلب الخيام وعله الخوه السلام
.....يبوفاضل
اصد لطف وانوح واصيحن وين اروح
........يبو فاضل
يعباس انكشف ظهري وعليه امبينه الكسره
يخويه شما الم حيلي افگدك والهوه يطشره
اليوم الحيرة ياعباس عشتها بغيبتك حسره
شمت بيه العدو ورديت كل نگلة جدم عثره
محتاره اخيك يفاعي...ومحد بالخيام يداعي
وجهي انترس شيب يخويه
وبدموعي ينشاف ضياعي
ياعذابي...يابو فاضل...يامصابي يابوفاضل
.................................................. .
اجيت اركض عليك وعثر گلبي بإديك
......يبوفاضل
لوه اذراعي الزمان وفگد خدري الامان
....يبوفاضل
اخوي انته وشريج الروح وغيرك ياوفي شعندي
العمر جبنا سوه انه وياك وهسه شلون اضل وحدي
وين الگالي اخو مثلك شهم ومروتك بكدي
اذا ماتنظر اسمع هاك كل هذا الفزع ضدي
ماريد اجرحك يغالي...بس بعدك يضيع دلالي
وتعطش بالخيام يتامه
وتتسلب اضعوني تالي
ياعذابي...يابو فاضل...يامصابي يابوفاضل
.................................................. ...
اخوك اصبح غريب وصبغ وجهي المشيب
....يبوفاضل
اجيتك خويه كوم بده وصار الهجوم
....يبوفاضل
صرت من حيرتي اتمنه اكبر امنيه بعمري
اغمض وافتح عيوني واشوفك واكف بظهري
اردهم وانه اخو العباس ولكن ياگمر تدري
ظهر الماله اخو مكشوف وعيني وگلبي يم خدري
حيره انا حرت بحياتي ..بين العده وبين خواتي
اعوفك الخيل تجيلك
يمك اجي تضيع بناتي
ياعذابي...يابو فاضل...يامصابي يابوفاضل
.................................................
ظهر عاشر طويل واهيدن مستحيل
....يبوفاضل
انه فاگد عضيد حزام بظهري ويد
....يبوفاضل
يخويه الدنيا مابيها غيرك بي اشد همتي
اخوي ومن تطيح اليوم يعني انحجت سالفتي
شور بالنهر خيموت الذابح شارتي وبختي
بعدك لا سكينه تنام ولا يطفن خيام اختي
برا الخيم ومن ادينه...راحو يطشرون حجينه
ويفزن ادموع رقيه اوهن العزيزات علينه
ياعذابي...يابو فاضل...يامصابي يابوفاضل
الشدايد يلكفيل يميلن وين اميل
....يبوفاضل
اطيح ومن اطيح اكض ظهري واصيح
....يبوفاضل
اودع عدمن اخيامي وعدوك خيله حضرهن
يخويه بعدك بساعات اصيرن جوه حافرهن
وخواتك ينسبن لشام الحادي بجسمك يمرهن
يشوفن ضيم مامشيوف وحجي يكسر خواطرهن
يرحن على نوگ هزيله...ونة سبي اليل طويله
خرايب الشام بلا باب وبيهن تبات العقيله
ياعذابي...يابو فاضل...يامصابي يابوفاضل
.................................................. ..
الملا: محمد باقر الخاقاني
اسم القصيده: انكسر گلب الخيام
رد مع اقتباس