گدام عيني من الفجر ضلوا هلي يحملون
شلعوا دليلي وحدبت من گاموا يسلمون

من هسه صارت غربتي ...من توادعت وي عمتي

سهرانه وعيوني تهمل عزاز الگلب يمشون

رايحين وداعة الله ياهلي ..

بعد ماكو بنيتي كولي تدللي

راحو ....راحو هلي..... راحو
.................................................. .....

سولفته بعيوني الهظم ومشابگ وي حسين

غير السفر وي الضعن گلالي شتطلبين

كتله الگبر اهون الي...نفسي اجره بيا علي

المن يضل بيه النفس واحبابي متغربين!!

للضيم اضل لو للطم لو للدمع!!

حسيت من نظراتهم ماننجمع

راحو ....راحو هلي..... راحو
.................................................. .....

لو بيدي اعيدنه العمر لاجنه ماينعاد

سنيني وبلا شوفة هلي وحسين ماتنراد

يا وحشة غروب العمر ....دمعه ونعاوي للفجر

امشي اعله واهسكم كلت لو مالي مگعاد

انا ورقية نصير نفس المحمل

شنهي التعب وياكم انا اتحمل

راحو ....راحو هلي..... راحو
.................................................. .....

گلبي بهوادجهم مشه وبعيوني صفنة غار

ثاري اليحب ومن صدگ عليه الزمن يندار

عبدالله حس ضيم الاخت..من حضن ابوي ويلتفت

ماطولوا اهلي ومشوا جنهم علي خطار

تفطر دليلي النوگ ياوناتي

وعباس دمع من سمع جلماتي

راحو ....راحو هلي..... راحو
.................................................. .....

ماترجع ضعون المشوا ياروحي لو صحتي

فك عينه بعيوني الحزن ومن هسه فاتحتي

يحسين يابوية صحت... ياهو الـ الية لو رحت

بنية ومريضه وسافروا للموت طايفتي

الينشدني عن گلبي الحنين شلونه

مهظوم ماراح وي اليحبونه

راحو ....راحو هلي..... راحو
.................................................. .....

الملا: كرار الكربلائي

الشاعر: سيد صادق اللامي

اسم القصيده: ضلوا هلي يحملون