على الحيهم نشامى الوطن ربانه
اذا واحدنه ضيم يصيب جيرانه
ربينه إبيت واحد حضن واحد جان
لسه البيت واكف بأمل ذكرانه
اول ماتطب للبيت ماكو أبواب
من سعف العراق البيت بيبانه
بيننه بطيب أساسه وحاوطيناه شوكَـ
ذني أثار إيدينه بوجه حيطانه
كتبنا هنا عمر وهنا علي وعباس
طب لكربلاء والنجف تقرانه
أكلنه بزاد واحد من فرد ماعون
ماتاكل وحيد الوطن وصانه
كد مالمه حلوه من يصير الزاد
هور وجبل يكعد ياكل ويانه
جن بيت ابوذيه جان ذاك البيت
وبگاع العراق الوكت خطانا
إذا تفرز شطرعن شطر المعنى يروح
من نلتم فقط يكتمل معنانه
ممكن نختلف بس اختلاف اخوان
مانعرف تبات كلوب زعلانه
لذلك حتى مانتفارك من نموت
جماعيه لكوها كبور موتانا
ألف بأساً لمن حاول يشب النار
ولوّن غايته من ألوان دخانه
وألف بأساً لمن حط بالشوارع موت
على ظهر الجنايز جثث خلانه
طبوا بينّه رادوا اعداء إنصير
حتى البيت ذاك تطيح عمدانه
وحكَـ نسرالعراق إلـ على البيريات
وبهيبة وكفته بوجه عدوانه
وحكَـ طبكة جناحه إلرجفّت صوبين
بي يدرون إذا تنفتح جنحانه
علّمنه الوطن غاية حياة الموت
وبجذع النخل بالحرب شدانه
وقسم وياه قسمنه لو رحاها تدير
نمتد حدر جدمه ارواح يلكانه
من روائع ايهاب المالكي
رد مع اقتباس
