الشاعر البصري: علي العذاري
(بعد أن سئلني عن الاوضاع في بلدي اضطررت للاجابه وانا محرج)
الشمس شالو رحمها ....وهسه تجوي بلا رحم
والفقر...؟
عمره طويل
وجنه ساتر
ماتت الوادم عليه
المأذن حارت الوادم بأمرها.....
تلقي اسم الله مره ...
ومره تلقي الي يعبده
الجكاره ..؟اول شهيد يضحي من اجل المواطن
حته يخلص من حياته ...... (ادخلوها بسلاح قاتلين)
هذه مدخل كل مدينه
انطرشت بصوت ارمله تودع جنازه
......
البلابل تنبح بقصر السياسي
الحجاره الجانت بكلب المعابد
صارت بكلب الكراسي
كل دقيقه بعمري هند
وبيه ياكتر التباوع
تلكه حمزه
بجبدي تاكل........
ماتهدني
تريد اصيراً كلي لكمه
وأجرت كل المصايب....
بلكي وحده اتجيب راسي...............
بلكي وحشة ليل منهن
بيه اموت بعين ناسي.........
انته تعقله منكلك؟؟؟؟
كمنه نشتم ريحة البارود من صوت الزغار؟؟؟
وهاي موروثه من ابوي
لأن جان شما يغص؟؟
يرتوي بطاري الحرب!!!
وكت جان الغزل
بي كلش صعب
والرصاص اعيونه صلفه
وحته ببيات القصايد هم يطب
وبيه جان الساتر الله
وماكو ساتر للحرب
وكت شاف الغار متروس بيتامه
معشعشه بحلكه الحمامه
وهو يعرف ذولي اصحاب الرساله
لئن باني الجوع بيته
بنص وجهم
وهاي جانت عد ابوي اصدق علامه
وهو يدري الدنيا شجره
وباجر تثمر قيامه
ارتكب في ضنه جريمه
طير من العش حمامه....
حته لاحذوت درعهم تسحك متون اليتامه
وهسه يسهر
ليله مايقبل ينام
يرسم اشجار اعله حايط
راد يكفر عن ذنوبه ويسعد كلوب الحمام
وبيه جان ابليس يفتر بالشوارع
مسرفن اردانه ويصيح
هذه موسم خوش موسم
خل المن هسه رزقي
قبل لامتني يطيح
كون اخلي الشمس ترجع
وكت الغروب لسماها
مبلله بدم ومنيه
وهسه عادوها القضيه
هسه خد الورده اصفر
امبين بلونه الرعب
وشفت بعيوني الكصايب والترجي
التراجي
السابقآ جانن يحلن راس طفله
من المحله
مفرهدات وصارن براس الدرب
وصوت شده ياورد شده ........كمت اسمعه من التقاطع
شده ياوكت شده
هسه عدنه العيشه شده
الصليب يبجي مريم
والثمن همينه شده
والمسيح الباع دينه
وطاوع المعبد علينه
وينكر العذراء عذره
وكتشف من كبل مده
وكت بي خطار اجته ونامت بنص جيبه شده
انته تدري ابطن بيتي يختنك حته الهوه
وعدنه شحت نوم لو واحد يحوس
بس زرعنه ابابه حكمه
لا تدوس بجرح غيرك
اليدوس بجرح غيره تالي بجروحه يدوس...
رد مع اقتباس
المشاركة الأصلية كتبت بواسطة مرتضى الطيب
