الى الفنانه المرحومه ليلى العطار
التي عبرت
عن انتمائها ولائها للوطن
برسم لوحة لدكتاتوري الغرب
في زمن كان الفن قظيه
.......
اتعلمنه منج درس
اللوحه من تحترك
ابريجه يبلع قلم
ولدنيا تعلن حزن
جادرها غيم بسمى
والطلقه تصبح علم
والموت جمله يشب
وبوادي يختل جبل
والغربه تصبح حلم
شحجيلج انا جرى
بغراب طاح لنسر
وسكران ادى لقسم
والسمره طاحت عثك
ابستان جارت حقد
وأخذتها منه ظلم
وياليلى راعي انتحر
كسروله ناي الونس
ومدوله جف سلم
وهسه بسواتر نفز
بحروب تاكل زلم
وابدمنه سير بلم
اجروفه ساتر حرب
ريوكه طعنت سهم
وبطلنه نرسم بعد
بطلنه نكتب غزل
الخبزه صارت علم
بطلنه حتى النظر
شيفيد نقره نظل
كتبونه اخر رقم
ياليلى رسمي شعب
ابستانه فاض لثمر
وصحابه جلد وعظم
وردينه عبر الزمن
ابرسمه وكت اليحب
يرسمنه بيده وشم
وكت الرسايل ورق
ومرسال يمج طفل
بفلوسه حرك جدم
وكت الدوائر امس
الظحكه بيها ختم
شحجيلج انا اجرى
ياليلى كلشي انتهى
وباكوه حتى النجم
والراح صعبه يرد
قصتنه وحده تظل
اعضاء جنه بجسم
احنه الجمعنه أجل
كتلونه احنه بوطن
وكتلوج انتي برسم
..مصعب هشام
رد مع اقتباس
