هنا

[صقر عراقي]

سبحان الله دا اگلب بموضوع عودة سوزان وچان اشوف اسمك واتذكره واجيت اعدل ع رد بس لگيتك كاتب ردك




ماكو مشكلة مو جديدة عليه انه افتري عليك تدري بيه احب اداهرك ، بس گلي بعدك من جماعة ابو العوچية لو حولت ع العصرية ؟

ههههههههههه
ابتركيا طلع مغشوش فتركته الك ياخوية
ماكو يمي لاعوجية ولاشمسية
ظل العب بيها وحدك
حبيبي حياك الله

[Samer]

https://www.dorar-aliraq.net/showthread.php?t=59118
هنا دتاكل هريسة
ومبين عليك اكال هل حاطيلك ٣ مواعين
هنا انت بالريف
هاي منطقتك
لو رايح خطار

وبعدك حلو مثل ماواضح بالصورة
لو هسة تغيرت

تدري ما اتذكر المناسبة .. عل اكثر رايح خطار

اي طبعا حلو واخبل، والرجال بجماله مو كماله خخخ

زين هاي دراستك شوكت تخلص وتتخرج
مو موتتنا

شتريد من حالي .. هسة راح تبلش امتحانات المرحلة الثالثة النهائية، بعد مرحلة رابعة، من تخلص افكر اقدم على شنو هع

ضيف عزيز ولطيفالف هلااا

...
يسلمووو لاڤندر

نورتي

جان كبل المنتدى طبعا مو كلة
بس اغلبة بي عصابات

والعنصرية المحافظاتية واصلة مرحلة بعيدة

وجنت اشوف تساهلك وتساهل النواب وياهم
خوفا من زعل احدهم فيزعل معه الجميع
وبالتالي خروجهم من الدرر

اما بكيفنا نسوي اليعجبنة اما نزعل


معقولة كان اكو ضعف من الادارة اتجاه هيج مجموعات
لو انت جنت تشتغلهم عالبارد وفتتهم

ممكن اكو ضعف، وممكن نقدم تنازلات لناس .. بس على اي حال .. ما نسمح احد يأذي غيره، والعصابات مو شرط تكون مؤذية، مرات هي مجرد عصابة . ما عدها اذية على احد

الادارة تتصرف وفق المعطيات والمصلحة .. قدر الامكان ما نضحي باحد، عل اقل قبل هع

ممكن نعرف رأيك بهذا الموضوع
بما انك تدرس قانون

https://www.dorar-aliraq.net/showthread.php?t=1305450

ما عندي رأي معين .. على اي حال حكم القاضي لازم نحترمه دائما، ولازم نفترض انه ما صارت ضغوط ..حتى لو اكو ضغوط .. لان القضاء هو الحد الفاصل بين العدالة والفوضى، ايا كان وضع البلد

برأيك شوكت الانسان يوصل مرحلة الكمال
والكمال لله

ما يوصل طبعا

بس النية السليمة+العقل أو الذكاء يؤهلك أنه تكون كامل، حسب تصوري

هم تستعمل عطر معين
لو كلة من هذا الخبط

ما استخدم عطور اصلا ولا من جماعتها.. فقط معطرات

برأيك لو باقي صدام يحكم العراق
افضل لو هذولة احسن

اكيد لا .. حكم صدام لا يقارن بيه اي حالة اخرى، ولو ينطوني الخيار ويقيدوني بين الاثنين، اكيد اختار (ذولة) على صدام

(ذولة) لو بيدهم يسوون مثل صدام على اي حال، بس الوضع العالمي تغير، والدستور يقيد الانزلاق إلى وضع مشابه إلى صدام، رغم علاته

*تتوقع القانون بالعراق ايوكل خبزة ؟
*شنو علاقة الحيتان بالقضاء ؟ مثال نور زهير
*بما انك من مؤيدين تشرين، شنو جان ينقصها حتى تحقق اهدافها؟
*ليش ما تستثمر امكانياتك العلمية خارج العراق ؟
*شنو فائدة تدرس وكاعد بالبيت مثل حال اي عراقي روبوت شغل بيت سوك؟
*يمتة نشوفلك بحث علمي منشور بالدول المتقدمة؟
*بما انك تتابع العلماء ما فكرت تجاريهم؟ والا انسان عمره 40 سنة وعنده شهادات 3 لابد اكو مشروع يخدم بيه بلده؟

القانون ممكن يوكل خبز
ما اعرف
ما ينقصها شي، هي انتفاضة عبرت عن تطلعات الشباب، وكالت للناس شنو اللي ببال الجيل الجديد، اللي راح يبدي يستلم ادارة المجتمع، شيئا فشيئا
ما اريد اطلع خارج العراق، .. بالنهاية اني انولدت هنا، ومهما كان وضعي بالخارج ابقى اجنبي وغريب
العلم بحد ذاته فائدة، مو شرط ترافقه فائدة اخرى
عندي بحث منشور لاغراض الماجستير .. بس ما مسوي بعد، واكيد ما مسوي شي خارق
الدولة اذا ما تريد تستثمر العلماء . راح يضطر العلماء يكعدون بالبيت

*شنو الخدمات الي جاي تقدمها للدولة؟

*في احد ردودك قلت، ما انشر الي اتعلمتة يروح الشخص لنفس المكان ويتعلمه بينما القران اله رأي ثاني بقوله تعالى {لَتُبَيِّنُنَّهُ لِلنَّاسِ وَلا تَكْتُمُونَهُ} اية صريحة تتحدث عن نشر العلم كما معروف زكاة العلم نشره،، انت ما تزكي؟

جاي اقدم خدمات للدولة كوني مواطن صالح وما اخالف القوانين
المعلومات اللي براسي (عن الحاسوب) كلش هواي ومتداخلة ومعقدة، اللي يحتاج ادرسه لازم اخصصله هواي وهذا الوقت ما املكه، وكذلك الموضوع يحتاج (علمود تتعلم) عندك انكليزي ممتاز.. واغلب الناس بالعراق ضعيفة جدا بالانكليزي، حتى طلاب الحاسوب نفسهم، عل عموم اللي واصل مرحلة، وواكف بشغلة محددة ومعينة ويسأل عنها ممكن اجاوبه

*اذا لا تتواصل مع مجتمعك بمواقع التواصل ومنطقتك بحل المشاكل والحديث مع الناس بشنو فايد منطقتك؟
*برأيك شنو الغاية الي انخلقنا لاجلها؟ والحياة الي جاي نعيشها بالعراق شكد نسبتها من الغاية من الخلق؟
*تؤمن بقضية العرف العشائري ؟ كاعد بحياتك بطلابة عشائرية ومساهم بحلها؟

كافي شري بخيري .. ما احتاج اكون مفيد بقدر ما اكون مواطن صالح،واذا الدولة ريد تستفاد مني .. فكلي اذان صاغية
ما اعرف الغاية اللي انخلقنا لاجلها، ولا العيش بالعراق اله خصوصية بهذا الشي .. سلبا او ايجابا
نعم اؤمن بالعرف العشائري في حال غياب القانون، اذا يغيب القانون لازم اكو قواعد تحكم الناس ،
ما كاعد بطلابة عشائرية، بس بمساهم بحلول هواي طلايب

*لو كنت معلم بمكاني وصفك بيه 60 تلميذ شلون تثير انتباههم؟
*ممكن تحجيلنا عن الفترة الي عشتها بالابتدائية؟
*شنو علاقتك بـ الرقم 40 ؟
*انت من اسره جاهدت ضد النظام السابق لو عائلة فقيرة؟
*احجيلنا عن رفحاء؟ شنو التضحية الي تستحق العائلة تستلم دفتر وامتيازات وتعيينات ونفط وسفر؟
السؤال الاخير اذا ما يعجبك حولة على صقر

الطريقة اللي تثير انتباه أي شخص، هي انه تخليه يفهم جوهر الشي ..اساسه، عمقه، وبعدها هو يبقى عطشان للتفاصيل
فترة الابتدائية فترة فوضوية .. عرايك وسطحية وكل الاشياء السلبية، بنفس الوقت كنت افهم تماما اللي مكتوب بالكتب .. وببالي المعلومات لحد الان
ماعندي علاقة بالرقم 40 .. عدا هذه السنة
لا فقيرة، ولا من اسرة جاهدت ضد النظام
السياسيين اللي استلموا زمام الحكم بالبداية هم من رفحاء، لذلك منطقي جدا انه يسنون قانون يخدمهم، وحقيقة مو كلش اشوف مشكلة بهذا الشي، لو كانوا خدموا البلد بالمقابل، و (لو) حرف يفيد امتناع الجواب لامتناع الشرط

[فقار الكرخي]

هاي بعدك عايش

[❥ اوليڤَيــــــا✿┊❥]

الموضوع عبارة عن اسئلة فقار
ماتمل ماتعبت

[فقار الكرخي]

الموضوع عبارة عن اسئلة فقار
ماتمل ماتعبت

واحد شايل لحيتة
والثاني متعاجز منها


اي غير انريد نعرف الناس زين

[Samer]

...................................

كنت تمشي بالاربعين ام هذة مناسبة عند الجيران

ما اتذكر والله ، وما عندي خلك احاول اشوف حيثيات الموضوع واتذكر

سلام عليكم مرة أخرى استاذ،سامر
نناشدك تزويدنا بصور تخرجكم السنة القادمة بأذن الله أن ابقانا الله وإياكم متمنين لكم النجاح والعمر المديد كما نطلب ونتمنى نشر بحث تخرج البكالوريوس..ورسالة الماجستير بعدها ..والأطروحه .. فاني أحب جدا نشر هذه البحوث لاسيما إذا كان طالب الدراسات الأولية والعليا..نشر مواضيع نادرة لم يسبق التطرق لها أو قلما حصل ذلك...وايضا من باب زكاة العلم نشره ...أن أمكن مع خالص التقدير والاحترام..

ههههههه والله اني مو من النوع اللي ينشر العلم، وانما بس احاول احصله ويعجبني احصله واتمعن بيه
والله ما اروح حفلات تخرج وتعارف .. ما يعجبني عادة، بس اشوف .. خل يجي الرابع

خل اوصل لبحث التخرج وازودك بنسخة إن شاء الله

بالقانون، اذا ما رحت للماجستير، فمعناها ما راح اتبحر بيه كفاية .. الله كريم

السلام عليكم/
مارأيك باللعن في المنتدى ؟لعن الاشخاص المتوفين او الذين عليهم خلاف مابين المذاهب او الشخصيات السياسية كالمالكي وصدام اوالشخصيات التاريخية و الدينية؟
لماذا يتقصد البعض اللعن بقصد الاستفزاز وماهو دوركم كادارة في معالجة الموضوع ؟

اللعن والسب والشتم لأي كان، شخصية عايشة او متوفية، سياسية او غيرها ممنوع بالقوانين، واللي يرتكبها تكون مخالفة للقوانين، واللي يصر عليها يتم حظره بطبيعة الحال مثل أي مخالفة يتم الاصرار عليها، حسب مبدأ (العود) بالقانون

الغاية؟ ما نريد نشيع اجواء السلبية بالمنتدى .. وهذا نهج ثابت في درر العراق حسب تصوري، ويلائم وضع العراق المتعدد الطوائف والقوميات والاتجاهات، والمنتدى اللي يحمل اسمه

سؤال لسامر من يجي

شنو رأيك بالشخصيات الوهمية اللتي غايتها تأجج النعرات الطائفية من خلال مواضيعها المسمومة والمخلوطة بالعسل

في نهاية فترة تواجدي بالمنتدى، غيرت القانون، واعتمدت معيار (النهج العام) اللي هو نقطة (5) بالقوانين، والنهج العام يعني انه العضو يسجل في المنتدى لأجل (اجندة معينة)، قد تكون تجارية او طائفية او أي اجندة حاطها بباله عند التسجيل ويطبقها عبر منشوراته وتفاعله بصورة متعمدة ومتكررة، اذا ثبت وجود نهج عام غير طبيعي فالعضو يتم حظره اذا ما تخلى عن هذه الاجندة

اللي يسأل عل طبيعي ؟ الطبيعي هو انه تتواجد كانسان طبيعي وتتفاعل مع الناس مثل اي شخص طبيعي وتعطي ارائك بصورة طبيعية ، ايا كانت تلك الاراء، بدون اجندة معينة تكون هي الهدف من التواجد هنا

نورت سامر وعاش من شافك


دير بالك تسويها وتحذفه كاتبة كومة ذكريات
منتظرة ابني يكبر ويشوفها

ههههه ان شاء الله يبقى ..حتى للقراءة فقط

سامر بعده يجاوب لو اختفى حتى انزل كم سؤال خفيفات ع معدة

هههههه اهلا بيك

نزل خويه سامر يحتاج اشياء خفيفه وتساعد عالهضم لأن ست مواعين هريس مو هينه الله يكون بعونه
سامر وانسان ثاني وكثير ممن كان يحيي هذا الصرح الجميل سعاده لاتوصف بأنكم هنا ومدت بنا الحياة لكي نقرأ ماتكتبون

نورت اخ عدنان تحياتي

نريد استفسار من سامر
هذا السؤال ديني لوسياسي لومسح الارض وتنظيفها الى صدام والمالكي مثل ماتفضل الاخ
يعني يحضر العطابة قبل الفشخة
يبدأ الناس بالتدريب على احترام المجرم ثم تتهيء الارضية الى جيوش تتبع سياسته فتدخل العراق مجددا وهيلا هب .؟
...............

هو سؤال بخصوص سياسة المنتدى، ما يتضمن مخالفة، وتمت الاجابة

اهلا وسهلا بمن قام بالسرد
والضيف الطيب
لكم من جزيل شكرى

مرحبا بيج .. نورتي

مرحباً سامر

طبعاً اعتذر اذا احد هذه الاسئلة مكرر لان قريت لحد الصفحة (٣) لذلك تگدر تتجاوز السؤال المكرر

١ _ من خلال مشاهداتي لـ مواقفك من ٨ سنوات لحد هسه اگدر ارسملك خط بياني ، يبلش من اليميني المُحافظ المتدين ، وصولاً لليساري المدني القابل للتغيير و التأقلم ، اني شخصياً كلش احترم الشخص الي يغير من نفسه نحو الافضل (الي هو يشوفه افضل) ما احب الانسان الجامد الي يبقى بنفس العقلية لسنين طويلة ، سؤالي ، شوكت بلش هل تغير ؟ شنو اسبابه ؟

نعم كنت محافظ، ولا زلت محافظ ، من بلشت المنتدى غير متدين، ولا زلت غير متدين، .. ولكن اكو تغير فعلا ممكن صار بالـ 2012 صعودا .. تفتح عقلي على معلومات جديدة وافاق جديدة، خلتني اشوف الامور بمنظار مختلف، وإن شاء الله ابقى اتغير، لان اذا بطلت اتغير، معناها عقلي اصابه الجمود
ما اشوف نفسي يميني او يساري متطرف، احاول امسك العصا من الوسط

٢ _ انت درست في ماليزيا ، محتمع متطور فكرياً و تقنياً ، على صعيد التجربة الشخصية ، شنو ضافتلك هل تجربة ؟ شنو القناعات الي غيرتها بتفكيرك ؟

ماليزيا نفسها ما ضافتلي هواي، مجرد اكدت عندي المؤكد .. هو انه العالم اوسع بهواي من اللي نتخيله موجود

الدراسة من جهة اخرى كلش فادتني

القناعات اللي نشأت (ولو ما اسميها قناعات) ماليزيا ما الها الفضل بيها

٣ _ قبل كم سنة شفتك مثل الي تروج لمشروع سياسي ، ما اذكر التفاصيل حقيقةً بس في وقتها سألت سوزي گتلها شنو مرشح نفسه ! جاوبتني بوكتها بس بصراحة نسيت الجواب و بقت هل فكرة عالقة بذهني ، اذا ممكن تشرحلي بشكل مُبسط ؟ وهل ترى في نفسك سمات رجل السياسة ؟

ما رشحت نفسي ولا قررت ارشح بأي سنة من السنوات، ولكن نعم، دعمت خطوط سياسية، دائما كنت داعم للقوائم المدنية ايا كانت، لسبب بسيط، انه المدني من تحاسبه ما عنده ظهر يستند عليه، حتى الله مو وياه
اني اشوف نفسي ممكن انجح في اي مجال، بشرط تكون عندي الجدية بالموضوع، وما اتعاجز خخ، السياسة، القانون، الاقتصاد العلوم السياسية، فضلا عن المجالات العلمية، بس الواقع انه اني عجوزي بشكل فظيع


٤ _ تگدر تنطيني اقرب حزب سياسي او شخصية سياسية قديمة او معاصرة تميل لمنهجيتهم ؟ خلي نعرف منو من الممكن ان يكون الاقرب لمنهجك ^-*

ماكو حقيقة .. اني افضل جو ديمقراطي يخللي (المدنيين) يتنافسون بيناتهم على برامج معينة، مثل ما يصير بالدول المتقدمة،

اما عل شخصيات او الجماعات، فماكو ملائكة ولا اكو شخص اكول (اي هو هذا) واصلا هذا مو صحيح، ماكو شخصية يكون (هو هذا) حتى لو كان توب، فوجوده بالسياسة لفترة راح يخربه وبالتالي لازم يتم تبديله لاحقا

٥ _ سؤال شخصي جداً ما اعرف تحب تجاوب عنه بعمق او بـ اختصار ، في بداية تواجدي بالدرر انت كنت على ما اعتقد في نهاية مرحلة دراسة الماستر او احتمال هسه راجع للعراق ما اذكر بصراحة ، المهم چانت الادارة بيد اركي ، لان سوزان مختفية بسبب احتلال مناطقهم ، صارت رجعة سوزان و رجعتك و دخولي في نفس الوقت ايجوز خلال شهر ، و بوقتها انت حچيت ويايه على فد فكرة ابالك انه تحاول تحيي المنتدى وتسوي تغيير بالمنهجية ، وچنت تشجعني على تغيير سياسة القسم السياسي و بوقتها سملتني ادارة هل قسم و فعلاً صار الي وعدتني بيه ومحد ادخل بالقرارات مثل ما اتفقنا ، الغريب بالأمر انه ماسويت اي شيء من طموحاتك الي حچيتلي عنها ، بحيث حتى اني ما بقالي واهس وطلعت بعد كم شهر ، عندي تحليل انه اتعرضت لصدمة نفسية خلتك تفقد الشغف خلال كم شهر ، بل حتى ابتعدت اكثر من فترة سفرك و دراستك ، لان ماكو جواب منطقي غير هذا ، تگدر تشرحلي الي صار ؟

آخر سؤال راح اجاوب عليه خارج الاقتباس (هنا)
ما اتذكر التفاصيل بالضبط، ولكن اني هواي خطط وحملات ومشاريع بديت بيها وبعدين تركتها عل نص او تركتها او اصابني الملل او اي سبب ..عل عموم اني اسف اذا هذا اللي صار، اكيد اذا اتفقت وياك كان لازم ابقى وياك واتابع الموضوع وخل نكون صريحين، من ابتعدت عن المنتدى بفترة دراستي، صار من الصعب علي ارجع مثل قبل. خصوصا تقدمت بالعمر هع

نجي هسه لفقرة الخطايا ^___*

بـ سلم ماسلو للاحتياجات الانسانية ، اختلف علماء الاجتماع على حتمية وجود المال من ضمن الدرجات الاساسية ام عدم وجودة ، بعتبار ان طلبه يؤدي بشكل او آخر لأهانة النفس البشرية ، سامر انت شلون تشوف نفسك من الناحية المادية ، جشع ام طماع ام تطمح بـ الاكثر دائماً ؟

اطمح للاكثر دائما، بس اكو اشياء عندي اهم من المال، راحة بالي، وراحة بال الاخرين المقربين علي، .. سلم (ماسلو) ما سامع بيه على اي حال

مرة حضرتلك موقف تتناقش مع شخص و تحاول تبينله مدى عظمة عملك في انشاء الدرر ، بسرعة تبادر لذهني تواضع الاخوة محمد البصراوي ( مؤسس شط العرب) و حيدر الساعدي (مؤسس دجلة نت) و فادي كامل (مؤسس فنر توب) ، ابد ما شفتهم بيوم من الايام يحجون بهذا الفخر ! علماً اني وانت نعرف انه الاسماء المذكورة تفوق الدرر بكل شيء عدى التطور لانها انغلقت ، هل فعلاً المسؤولية تؤدي بصاحبها للغرور ؟

والله اخوية العزيز اني فعلا (مغرور) بالمعنى المجاز وليس الحرفي، .. من اشوف نفسي اقرا 150 صفحة بساعتين اشوفهم لاول مرة واروح امتحن واجاوب بدرجة ممتازة والطلاب الاخرين لايصين الوضع، اي واحد بمكاني يحس بالغرور خخخخخ

بدرر العراق سويت شي ممتاز، لأن بيدي انجمعت الادارة + الاختصاص العلمي (بالحاسوب) .. وهذا ما توفر للاخرين بطبيعة الحال، وما انكر دور الموقع ايضا بتطويري، يعني طورته وطورني

بس اني شوكت حاجي بفخر وكذا ؟ ما اتذكر ؟

بس خل اكلك شي مهم، في داخلي اني اشوف معلوماتي جدا قليلة، قياسا باللي موجود حتى اتعلمه.. الانسان المغرور فعلا، هو اللي يشوف نفسه يعرف كلشي، واني اعرف او متأكد اني جدا بعيد عن انه (اعرف كلشي) رغم اعرف هواي اشياء، لان الانسان العلمي فعلا، كل ما تكبر معلوماته، كلما يعرف انه مساحة جهلة اكبر بهواي.

اني واقرأ في اجوبتك لاحظت ميولك لجانب الفلسفة ، وهذا شيء عظيم ، بصراحة هذا البحر ممتع وانت تقلب بالنظريات الموجودة حتى رغم اختلافك مع بعضها بس اكيد راح تاخذ الجانب المشرق منها

شنو رأيك بفلسفة بوذا ؟

مقتطفات من فلسفة بوذا (بالخصوص مجال الروح والجسد) مو معناها اعرف فلسفة بوذا علمود اجاوبك عليها
شنو رأيك بفلسفة روح الله الخميني ؟
على الرغم من اطلاعي على فلسفة علماء الدين (مثل كمال الحيدري) بس ما قاري فلسفة الخميني علمود اجاوب.

شنو رأيك بفلسفة زرادشت ؟
كيفت عبالي تسأل عل كتاب نيتشه (هكذا تكلم زرادشت) عل اقل جان جاوبتك بشي خخ .. لا عيني ما اعرف عن فلسفة زرادشت نفسه

اني مرة سمعت محاضرة عن شخص يتكلم عن (فلسفة الالمان، وفلسفة الانكليز ووو ) .. ما عجبني اللي سمعته، .. اني ما اشوف صحيح نسأل على فلسفة جماعة او فلسفة عالم بصورة عامة ونحطها بتصنيف او تلخيص معين، وانما رأي فيلسوف في موضوع معين من المواضيع اللي ناقشوها الفلاسفة .. مثل الاله والدين والمجتمع والعقل والغاية وغيرها، الفلاسفة تكلموا على هذه الاشياء وكل واحد اعطى وجهة نظره بيها، غالبا من وجهة نظر ايمانه.

الفلسفة مو علم أو مذهب معين معين، الفلسفة هي جوهر الشيء واساسه وكيفيته، لذلك هي متصلة بكل العلوم

نجي على الاعمال الفنية

شنو رأيك بفلسفة مسلسل بريكنگ باد ؟

ما شايف مسلسل برينكنك باد .. ولو اعرف فكرته عموما (عل اقل من اسمه)
تعجبني المسلسلات اللي بيها بطل عبقري وتعرض نوع من الحزازير والامور الغامضة وكيفية حلها، شارلوك هولمز، ذي مينتالست، سوتس و لاي تو مي

انت چنت دائما تدعي انه المنتدى ذو توجه مدني ما تابع لـ اجندة ، مقتنع في كلامك ؟

نعم مقتنع
اني كـ عنصر محايد اشوف المنتدى في فترة من الفترات كان ذو توجه تياري *__^ ولي يحچي ع تيار الادارة تغضب عليه ، و استشهد بسوزان اكيد تذكر هل فترة !
حتى لو انت ما تملك هذا النفس بس لا تنكر انك سكتت و سكوتك كان موافقة ضمنية ، بينما حالياً ذو توجه علماني

ابد ما كان ذو توجه تياري .. بس في فترة ما كان الصراع بين التيار وبين جماعة المالكي على اشده، في الوقت نفسه كانوا المدنيين يقمعون من قبل السلطة اللي كان المالكي على رأسها، لذلك اكو نوع من التحيز


عموماً اني ما اعتقد بوجود اي وسيلة اعلام حرة بدون ما تخضع لـ اجندة او آيدلوجية ولي يگول غير هذا الكلام ما اصدگه ، لأن انت في حد ذاتك اجندة ، من تملي قوانينك وشروطك على العضو بهل شكل العضو مضطر يتبع منهجيتك

و اصدق تشبيه ورد في رواية زوربا لنيكوس كازانتزاكيس

أنا حرّ يا زوربا ..
- كلا لست حراً ، كل مافي الأمر أن الحبل المربوط في عنقك أطول قليلاً من حبال الآخرين

الاجندة اللي تحاول تحقق التعايش السلمي والاهداف الانسانية .. هي هاي الاجندة الوحيدة المقبولة

الحبل المربوط بعنقي طويل جدا .. وكلما يمضي الزمن يصير اطول

خاف ثقلت عليك ؟ شتگول كافي لو بعد

كافي تعبت هع

انسان ثاني
مشتاقين وينك وين ايامك وين تفسيرات الحلوة والخشنة علينه
كانت ايام ولحظاة حلوة معك يارجل
............
سؤال الى سامر
شنو رأيك اذا العركة انتهت وواحد جاي هداد ابحديدة
..........
الجواب يتوجه الى انسان ثاني
..........
والله مشتاقين الك عندك طلعات فوك الحلوة احضر يمعود وافتحنه موضوع جديد
حياك الله يارائع

اذا جاي هداد بحديدة مباشرة بعد العركة بوقت قصير، عادي .. لان تكون بدون سبق اصرار، بس اذا مرت فترة .. فيكون هنالك سبق اصرار والقانون يعامل سبق الاصرار كظرف مشدد هع

مرحبا صديقي
بصراحة ما عرفتك بس من اسلوب الكتابة مشبه عليك ، بس لا انت ابو رفحاء الي گاعد بـ امريكا و نهار كله تحچي عن مظلومية ابن السماوة و الدوانية ؟

المشكلة نسيت اسمك ولو هو مچان اسمك الحقيقي لان الي مثلك لحد هسه مؤمنين بفكرة (الاسم الحركي بالتنظيم) تخافون تكتبون بـ اسماءكم الصريحة

المهم انت هسه عرفت المن اقصد اني ، بربك انت نفسك لو غير شخص هههه

سوز .. اكو عركة هنا ؟ وتلميحات جارحة لو شقا هذا ؟ .. شوفيلنا الوضع

[عدنان الواثق]

السلام عليكم ...لاتخاف سامر اني خفيف عالمعده كلش ولا احب اسال أحد بس الله عز وجل ههه
ثامر الحلي مشتاقين
فقار ...كافي اسئله لأن بالنهاية مايطلع من سامر ولا ربع دينار للمديره
انسان ثاني اسئلتك حلوه بس يحتاج سامر يسوي برنامج خاص حتى يفك الضغط من الملفات المشحونه بمفرداتك وهو رجال أربعيني يعني صعب تحصل اجوبه مختصره .
للجميع وافر الاحترام

[Samer]

السلام عليكم ...لاتخاف سامر اني خفيف عالمعده كلش ولا احب اسال أحد بس الله عز وجل ههه
ثامر الحلي مشتاقين
فقار ...كافي اسئله لأن بالنهاية مايطلع من سامر ولا ربع دينار للمديره
انسان ثاني اسئلتك حلوه بس يحتاج سامر يسوي برنامج خاص حتى يفك الضغط من الملفات المشحونه بمفرداتك وهو رجال أربعيني يعني صعب تحصل اجوبه مختصره .
للجميع وافر الاحترام

وعليكم السلام .. والله خوية انت ذهب

راح ابلش تقييمات للناس اللي ما مقيمهم وبعد خلص مو ؟ خلصت الاسئلة ؟

[عدنان الواثق]

وعليكم السلام .. والله خوية انت ذهب

راح ابلش تقييمات للناس اللي ما مقيمهم وبعد خلص مو ؟ خلصت الاسئلة ؟

انت الذهب استاد سامر بدون مجامله

[فقار الكرخي]

السلام عليكم ...لاتخاف سامر اني خفيف عالمعده كلش ولا احب اسال أحد بس الله عز وجل ههه
ثامر الحلي مشتاقين
فقار ...كافي اسئله لأن بالنهاية مايطلع من سامر ولا ربع دينار للمديره
انسان ثاني اسئلتك حلوه بس يحتاج سامر يسوي برنامج خاص حتى يفك الضغط من الملفات المشحونه بمفرداتك وهو رجال أربعيني يعني صعب تحصل اجوبه مختصره .
للجميع وافر الاحترام

عمي اني ساكت شبيكم وياية

هاي الحلقة الوحيدة الي كنت جدي بيها
وما سألت خارج المألوف

اي ليش تخلوني اسئل