شَرّعتني چفوف غُربة ..
طشّرت زَفّة هَلاهل تمشي بالدَمْ
وباعني اللِيلْ إعله حَسبة خايفين ..
''وانه وجناح القصايد''
مدري وين مسافرين ..
ندوّر الگاع إعله شَهگة
ندوّر الگاع إعله رُفگة ..
نوصل لسابع سِمة مرايات گَمرة
ونندفع من چَف مُطر ..
نطيح غنوة لِيلْ بحلوگ السِكارىٰ
ونِنمحي بصحوة صُبح ..

ضايعين ..
درّة فكّت عينها بشاطي الحِزن ..
باردين ..
مِحبس المَوتىٰ الينزعوه للدفن ..

''وانه وجناح القصايد''
نرسم الفرحة بنعاوي ..
نِظفر الصَفنة قصيدة ..
انّناغي لِعب الهور والبَردي وعَجدنه
لحد ما يذبل حچينه
وننطحن بالرحّة حنطة ..
ماكو سدّة اتحشّم الغافي بگفاها ..
وماكـو طوفـة تعبّر الطايح وراها ..

كِلشي ماكو ..
واحنه هم مرّات ماكو ..
نزغر، شما شِفنه زفّة
نبرد، شما شِفنه ماي ..
نكبر، شما شِفنه عفّة
نعرگ، شما شِفنه راي ..

'وانه وجناح القصايد'
نرسم الدخّان گِذلة ..
نِظفر الساعة مواعد ..
إنتاني رفّة ثوب وشموع وتراچي
لحد ما تغفىٰ الإميالة
وننّثر ع الباب ذاري ..
ماكو نثية تطرز ثياب القَصيدة ..
وماكو منَحر ننصلب شذرة اعله جيده ..

كلشي ماكو ..
واحنه هم مرّات ماكو ..
وخاف يوم احنه انتصادف
هذا دخّان السنين المدري شنهي
احنه ماكو ..!







حسن علي الغالبي