المشاركة الأصلية كتبت بواسطة المستشار القانوني
وعليكم السلام ورحمه الله وبركاته
اهلا وسهلا ومرحبا بك ... وبهامتابعهاهلا وسهلا بالحبيبة نور
شكراً أحبائينوارة
منورة حبيبي
مُمتنة لهذا الترحيب
حياكم الله
4 أبريل 2023
"موعد قطف الازهار"
الساعة ال٨ مساءً
الوالد بسلامتكم احتاج عدد من الفحوصات بالمستشفى
رحت وياه سوينا اللازم و ردنا نطلع بوقت طلعتنا جابوا مُصابين بحادث سيارة ما انتبهت لاشكالهم لان جانت مليانة دم و بالي و گلبي ظل يم هالمصابين لان حالتهم جانت يرثى لها
ساعة 9:46
اجاني الخبر اللي صدمني و غير حياتي انه احد المصابين بهذا الحادث هي صديقتي (وفاء) ما صدگت!!
خابرت احد معارفي بالمستشفى و الا انه للأسف الخبر صحيح واني بالاتصال رحت بغير عالم ممصدگة شلون واحنه قبل يومين جنا نسولف و نتشاقه و نضحك وجنه نجهز لخطوبتها و شنلبس و شنشتري و منين *لان جان احد متقدملها وهي وافقت
وقبل كم ساعة هي تدزلي بصمات فرحانة لگت دكتور زين حتى يعالج امها
ليلتها جانت اتعس ليلة مرت بحياتي ثاني يوم رحت لاهلها امها بحالة جنون و جانت تصرخ بس من شافتني حضنتني و ظلت تبجي گالتلي حجاية عمري ما انساها "بيچ ريحة وفية يمه لتعوفيني"
دمرتني بهاي حجايتها و حاضنتني و نبجي اني وياها و اخر شي كوة كوة خلتني اطلع من البيت
المنظر اللي هناك جان فاجعة اليمة و تمنيت لو ما رحت لان تعبت بعدها تعب نفسي مو طبيعي مجنت گادرة اتخطى اللي صار، رمضان الفات جان تعيس و حافل بالذكريات الاليمة خصوصا الي لان لا انسى بسرعة و حساسة الى أبعد الحدود
من بعدها حسيت كلشي طفه بعيني و فعلاً هاي الحياة قصيرة و متستاهل و الانسان ميبقى اله فقط الاثر الطيب.
(أعتذر اذا البداية حزينة) لڪن هذا الشي اللي غير بيه هواي تفاصيل
الفرق اللي صار بين نور بهذا رمضان و القبله
مچنت اشوف الامور بوضوح و ما أهتم ولا افكر بأحد ما همني اساعد اهلي او اشيل حتى لو جزء من المسؤولية
ولا حتى بمساعدة امي الا بشي بسيط
بس بعد ما انحطيت بهيج موقف وعيت وعيت هواي و تغيرت واحس كبرت و تيقنت شغلة انه الاهل لو تنطيهم مي عيونك متجازيهم (من بعد كلام ام وفاء و حبها) صار اغلب شغل البيت عليه و ما اضوج اسوي هالشغلات و اني الممنونة
و شلت جزء بسيط من مسؤولية اخواني و تدريسهم
وصرت وياهم بكلشي وكل اللي يهمني اشوف اهلي مرتاحين ^_^
عادات رمضان من ناحية العبادة متغير شي
و روتيني من قبل 8 سنوات نفسه قبل اذان الفجر اكمل جزء من القرآن و بعدها اصلي ورا الصلاة تبلش المستحبات
_الاستغفار، الحمد، دعاء ايام رمضان
و الحمد لله ارتاح بعد ما اسوي هاي الاشياء راحة مو طبيعية ڪأنما هي غسل لذنوب كل الاشهر اللي فاتت
*الحلو بهذا رمضان
ويانا نفر جديد بالعائلة اللي هي روحي من الدنيا "لولو"
بنت أختي، هدية من رب العالمين احسها نورت حياتي و اقسم بالله ما احسها الا بنتي و متعلقة بيها تعلق مو طبيعي حب خيالي
ضحكتها عندي تسوه الدنيا و ما بيها
بالاخير نتمنى من رب العالمين يكفينا شر هالدنيا والله لا يوريكم شر بأحد عزيز
ونعيش هذا رمضان احلى من الفات و الايام الجاية تكون عوض عن كل حزن عشناه
ونصيحة اخوية لتزعلون اهلكم ولا حتى بحجاية و لا حتى اي احد الحياة قصيرة و أرواحنا هي مجرد أمانة مو مُلك النا
حافظوا على هاي الامانة لحد ما ترجع لصاحبها عمرها الخباثة و الحسد و الحقد مجاب نتيجة خلي گلبك لله و امشي بحياتك هو راح ينير بصيرتك و يبعد عنك الشر
كل شخص بحياتنا هو نعمة من اهل من اصدقاء من اقارب لان رب العالمين ميخلي بطريقك الشر
متعرف انت بالنوايا و لا الگلوب شنو بيها
عامل مثل ما تحب ان تُعامل
اتمنى جنت ضيفة خفيفة
نستقبل اسئلتكم اذا عدكم سؤال
ان شاء الله مايتعبونج بالاسئله
حياتي نـورة
الف هلآ
منورة عزيزتي الله يوفقج فعلا الانسان مرات يحتاج شيء قويه حتى يخلي يوعى لاهمية الامور ويعيد ترتيب اولوياته
نور شنو ترتيبج بالعائلة ؟
شنو اول اكله سويتيها ؟
شنو اكثر اكله تبدعين بيها ويحبونها الاهله من ايدج ؟
اخر اكله سويتيها ؟نشري لصورة؟
هم و ضميرهمان شاء الله مايتعبونج بالاسئله
رد مع اقتباس
