هنا

[ارجع يازمان]

محد ايضل ابكماله!
الدنيا فرتها قويه @ وأبد ما تبقه اعله حاله!
ممكن الترفض تكفله,, هو دبرلك كفاله!
وممكن الرايد تسجنه!,, تنسجن انته ابداله!
وممكن الراعي حلال,,ابيوم تعكس ,يشتغل راعي ابحلاله!
وممكن اني
الأضن نفسي خوش شاعر,, يجي واحد
حتى ما معروف اسمه! ايدمر أبياتي ابسجاله!
الحليم اتفكر الها
ويحسب أنفاس الرساله
والغشيم الفات بيها
وخله عالدنيا اتكاله!!
الكلشي خلاله احتمال! ومن تورط! كلشي ما فاده احتماله!
جنه سبعين احتمال ,,, انكول خلو!
هسه سبعين احتياط.. وما تكفي!,, الدنيا متروسه نذاله!!
المواقف تمشي بينه
وهيه تنطينا الدلاله!
كلشي ابوقته جميل,, ويضوي بعيونك جماله!
ومايضل حال اعله حاله!
ممكن الجادل ابشغله وينفعل ساعة جداله!
هسه صاير يضحك الها وأأأأبد ماتلكه انفعاله!
وممكن التانيته عمرك!,, هسه ما تهووه الوصاله!!
الدنيا من يوم الله حلوه
احنه سويناها مره ,,,, ابغدر وأطماع وجهاله!
ومو شرط كلمن تدين,,
صار مؤمن بالعداله!
يصح كافر
من تصح أعياد عدهم,, ايرخص الطلبوا مناله!
خاطر,, الفرحة جهال الناس ,,, تتمرن جهاله!
ويصح مسلم
يخزن الرمضان خاطر,,ايغلي عالصايم حلاله!
والمصيبه !!!الصايم ابرمضان,, يفطر باحتياله!!
وذاكه من ذاكه ال عله ربه... اتكاله!
عالخطأ
انعيد التجارب!
والفشل ماخذ مجاله!
انكول ماكو ابمستوانه! ,, وما نقدم الاستقاله!
احنه منفوخين بوخه
وماعبرنه الأستحاله!
الخَير البينه ميكدر
يمنع الروحه اعتزاله!
يرحل
وما جنه صاير
تبقه بس ذكره الوصاله!
هاي دنيا
الما تدوم الوجه واحد,, اشما سعى وزاد ابنضاله
كل الوِجووه تفنى بيها ,, اليبقى بس وجه الجلاله
الباقي بس وجه الجلاله.
حسين االساعدي