زحمة توگع يم شماتة
زحمة دمعي
زحمة توگع يم شماتة
ولصف مايّك كاسِر عيون المناير
زحمة دمعي ..وروج طبعك
ليش فلّاك البلم فلّة ظفاير
والموگعك شايل اطباع الگناطر
عنده خير الماي وافر
ما يهملك ..
وصى كل شامت بموتك خاف ينسى يغني باجر ..
لا يدمعي ..
الطيحة ما مرجية منك ..
يبو عيون الجانت تربي كرامة ..
موش گتلك بالرسايل ..ليش شگيت الرسايل والحمامة؟!
المزهرية الكشخت بورد الترافة
تصير سـﭼـين بكسرها ..
اي يدمعي ..
ذيج المغطية شعرها ..
سنين عرگانة بسترها
ادري لو مرة هدل بيها الحجاب بساع تندم
والورد ذاك اليفرع ثوب عطره
يبيع عمره وينگطع بعدين ينشم
وانا گايل ..
من يكشفنا سترهن .. تلگى بالنار الرسايل
زحمة دمعي ..شوگعاك
وأنت ساجد ..من تمر عيون ذنبك
تستحي اتكزبر صلاتك
وانتَ ذنبك بلبل ويدعي اعلى صيده
عاشرت تين الولاية وشلعت ريشات جنحك بلكت يگرب مماتك
وموش تدري اتسد شبابيجك يدمعي
شبيك ما حشمت اديه ..
هي مخلوقة الليالي اتضمضم نفوس الدنيّة ..
ليش تلهج دوم مامش
وانت تدري
الحايط بصورة عزيز يصير عايش
يا امدرّس .. درسيتك
وادم الينگال عدها ..
الميتة والباعت سترها اثنين من نفس الطوايف
هاي جثة بلايه روح ..
وهاي روح بلا جسدها ..
والجفوف السولفلك ورد غبشة
تلاگي بالمنجل نفس بصمات اديها
گتلك اثخن والدشاديش الخفيفة يبين المضموم بيها
وانا گتلك
شوف رايي ولا تطيح بگاع غربة
ابقى خاتل بين گاعي
وتدري هالدنيا رسالة تموت اذا ما الها ساعي
گوم وإيبس .. وانت تدري
الگصبة خضرة تعيش ﭼـذبة
لا تدنيها المضيف ولا تدنيها اعلى راعي
اي يدمعي
والبيوت الخالية بلايه عزيز
تصير طين گبال الاجدام النظيفة
وﭼـنها شروة اگبال الجيوب الخفيفة
گتلك اصبر!
والشبابيج التندّي ..
اتشگگ عيون الستاير
گتلك الشمعات والليلة الطويلة ماتن امتاناة باجر
گوم دمعي
حتى لو مشروگ نصك
گتلك الحگ وانستر من عين دربك
حتى بت الليل تلحگ ..تشگف المفضوح بيها
شيل روحك من الفطور التشربك
وگتلك المبيوگ بيته .. سنون شكه اتملخ الوردة بسلفهم ..
هي هاي عوف طبعك واحجي للصبير هيمة
ولا تسولفله اعلى ماي
وگوم سكتة ولا تسولف للگصب داعيك راعي
گبال حزنك ينفتگ للشفّة ناي
احضن جفوني يدمعي وموت
والعطابة والدم حيل ماتن بالمشابگ
كافي تدعي ..
وانت شاعر توّه يكتب ياهو اليسمعك يدمعي
ياهو يسمع حـﭼـي ظنونك
والولاية فطورها تكرهك يدمعي
اتدور الزلّة اعلى مايك
هذا رايي وشوف رايك ..
امير ال جدوع
رد مع اقتباس