يا هلبت تجي بلا خوف
مستاحش
تمر بيّة السـﭼـﭻ سكتة ..وأرد مذبوح
لن طولك بعد مامش
ولك عمري عطش .. عمري مهر مجنون
ولك عمري تعنالك .. يهلبت ﭼـلمة بيك تهون
أنا الطحت بدروبك مِذلّة .. وهَم
أفر گلبي بسواليفك وأطيحن دم ..
وإنتَ امسيّس بكل السواجي اورود
وانتَ امسيّس بكل الگلوب اورود
وبروحي تمر جدحة نجم للگاع
تجرحني ولا عوفك
وأخافن تثگل عيوني من أشوفك!
وأطيح بروحي من تجزي حطب وألهب
وإنتَ ولا تخضّر عود ..
ولك خضّر ولو بس ماي
اجيك امناحر السـﭼـة ..الـحـﭼـي امترّب على عيوني
وأصابيعي دمع وأمشيلك امرايّه
اجيك بحيل فختاية وأرد الك عشگ ما ينگال
وأطگ بعيونك المغرب شذر وهلال
ياخذني عليك الليل ..يالطولك سمه وهلال
أگعد بدربك سمه .. وإنتَ أكبر بعمري گمر
انا المبعثر سواجي ..وانتَ ها وسعك نهر
انا بيَّ السكتة تمشي سنين ..
تعبان النهر بالماي
ثگلان النهر بالطين
والسكتة جسر عالماي .. روحي لـ يا جرف تردين
يا هلبت تجي بلا خوف
زاهي الشوف بعيونك .. واحجيلك علي الليل كلّه
وترجف بروحي محنّة ..
غنّى حتى الخوف ..بيَّ الماي غنّى
وفاضت بروحي المحنّة ..
وأعتنيت الشوگ بيَّ وما خفت
خافت عيونك عليّة وما خفت
طشريت أيامي ..دوهني غرامك حيل
وبروحي تهت ..
وأنتَ كلش مستريح .. وانا من شفتك همت
انا من شفتك شبابيج العمر وجّن ضوة وقدّاح ..
وأيامي رصيف يروح للملگة ..ويرد مرتاح
والبيت اليخضرلك على العتبة عشب أخضر
وأظل انا على الشوفات خلگ يزغر ..خلگ يكبر
وتظل إنتَ على ايامي حرير أشگر .. حرير أشگر ..
علي الشبّاني
رد مع اقتباس