كلها اتعوفك يوم العازه,,,
بس لجماتك تبقه اوياك!
.
كلبك من يجفونه اعزازه!
ماتلكه الراحه ابدنياك!
.
ضم جرحك يمكن تعتازه!,,
اتوقع جوعان وينخاك!!
.
أعرف جرحك زين وتازه,,
وراح ايكفي اليتعناك!
.
جرحك يمشي ابكل اجنازه
اجروح الوادم ما تنساك!
.
ابيومك,,, يمشن جَنازه
ويذبن دم الفركاك!
.
ما حاجه ابموتك تتوازه
وتداين من هذا وذاك!!
.
تابوتك هيه العكازه
بيها ايشيلونك لهناك !
.
بس دبر دشداشه اعوازه!
حتى الدفان اليلكاك
.
ايراوس أكفانك بالبازه
ومتروح الدشداشه اوياك!!
متموت الدشداشه وياك!
حسين االساعدي