هنا

[فقار الكرخي]

ياحد ضال ساكت واكتم بصدري
واحط مية عذر للماعرف كَدري
اصعب مرحلة من يمر بيها انسان؟
من ايحب بشر والبشر مايدري.



هلا يالصَار مُده فارگيتك

مثل الطفل الما فار
لون بيدي على گلبي فرجيتك
تشوفه وتحكم بكيفك عليه..




جبت عمرك معاند

وانه اوصيك
كمر فوكك جنت ودور غيوم
كتلك هذا عيد وتدري بيه عيد
وصلت المرحله جي فاطر تصوم.






مثل فيك مالگيت الهسه في

يالعفت بستان روحي بلايه مي

جنت ماعرف الندم مثل الصليب
عالخواصر عمري مامديت ادي





هواي وادم

راحت وردت اجت
وإنتَ عمداً ما اجيت إتزورنه

جن ولا هي عيونه لجلك عمت
من تخالط عيدنه وعاشورنه





إلك

للشوگ
لحچاياتك الترفات
للشاطي العشگ ميه
و أرد بالتعب
چف
وفجر
وگلوب
واتحمل واگومن بية مابية





انه اتمنى اجي يمك

واسولفلك عـ احوالي
واحط بأيدك وجع گلبي
واكلك ياهو كتالي




تستاهل واتمنالك آنه الخير
صح فرصه مثلها من الصعب تلكه
خلي اذنك على صدري،سمعت الصوت؟
تسمع فرح گلبي ، تسمع الصفكه..
اكو عندي فرح زايد حرام يروح
مر اخذه بطريقك ساعة الفركه
بي تلكه ابتسامه تلكه ضحكه بصوت
انت ادخل بروحي بكيفك استنكه
انه هسه فرح بالروح مامحتاج
مايحتاج فرحه الينوخذ حكه..




ليله
اعله ضي الگمر
شفه وزند مشتعل
وبين الفرح والخدر مر العمر چيله

يا سفر ريه وعطر
دنيا ولذيذ النفس
والريح من سيرَت ع الباب شد حيله..






مشتاگلك
تندلني ماتندلني

يابعد ذنيج السنين وذني

هوه اني عمري معلگ بدربك خيط
وبكيفك تزغرني وتكبرني ..!!






چان هسه، لهسه ماذابل عشگنه
ولا أرد نص ألليالي والگه وجهك بلشوارع

بلمناير ..
چان هسه أسنيني ماگايدهه شاعر
وأنت ذنبك عاشرتني
وعلمتني أسكت اذا ماتحچي يمي
وعلمتني الدنيا باچر..
وآنه انطرك كتلي باچر

هسه باچر
هسه باچر!!!






ندم كلي ندم من جدمي للراس
لان شلتك حلم وبروحي مريـت
حضنتك سيف تذبحني واداريــك
وتكَـص حبل الوصل وتكلي شديت
نطيتك ظهر جرحي وامنت بيــك
وجبت ملح الغدر بجروحي خليت
وتعيرني كَـعدت بفيك سنيـــــن
ياشجرة غرور وبيك ثقـــــــــــيت
اذا ماتت الشجرة تصير تابــــــوت
ولان ميت ضميرك هيجي سويت






سـولف يـاگـبر شـــــــخبار الاحـباب
نـمـر أبـالـهـم لـو مـا يـذكـرونه
لبسوابيـض وغـــــــطاهـم تــراب
أحنه اسود لبسنه بيوم عــــــــافونه
گـللـهم تـره مـا گـلـنه غـياب...
وذا يردون نحجي خل يحاجونه
سولف ياگبر ذوله احنه الاصـــحاب
وسنين الـعــــــــمر جـواكـ مدفـــــــونه






راح اسولفـلك عليـه
وآنتـه قيـس
ويـن واصـل
بالعشـگ يا مستـوى
مـره جابو صورتـك واني مريـض!
هيـچ كتـرت آلـدوه وشمـيت آديـك
ثاري بيـك العافيـه مـو بالـدوه





انه بكلشي اختلف بالضحكه اظل متعوب
وانه بگلبي سوالف تقهر المصيوب
كافي ياوكت من عندي يمته اتوب
شما امشي عدل تمشيلي بالمگلوب




انه منين اريد افهم ؟انه الغمض عيونه و مالحك يحلم
أنه المبيوك حيله و حيل ما مهتم
انه المحبوس نسمة برية الغركان
انه المطشوش عمره بماي ما يلم





لاتسولفلي اعله جرحك عمري ضاع
الجرح يشفه اسنيني وين الگيها
كون موگد الهوه شجابك عليه
چفوف مويمك شكو تلاويها
لاتبرر ذبلت الورده بديك
انته موگدها الشمس شعليها





مايِعثر مُهرنه...
اشما يِشحّ الحيل
ولا عدنه گمر يطفه ..
اويفشل الليل
صلفه اجدامنه...
وتعبر صحاري الخوف
اُونگص راس الخيانه
اشما يطول الذيل
يطربنه الجرح...
لو بات ملحه اوياه
اوتفِز مهره العزيمه
اشما تچلّ الخيل

[كرزاية]

مجموعة حلوه
سلمت ذائقتك

[فقار الكرخي]

مجموعة حلوه
سلمت ذائقتك

كرزايه الغالية
نورتي

[لـن نتصـالح]

- شلونك = تهت والعافية عيونك ... ♥️

[لـن نتصـالح]

ناايس

[فقار الكرخي]

- شلونك = تهت والعافية عيونك ... ♥️

نورتي يالغالية

[فقار الكرخي]

مجموعة حلوه
سلمت ذائقتك

نورتي الكون