حبيته ابوقت جان اليحبه ايموت!- حسين الساعدي
حبيته ابوقت كلمن يحبه ايموت
مو بعد السقوط ودنيا مامنونه!
.
أدري ابصحبة محمد تهَجم ابيوت!!
وأمن صدام جانوا ما يرحمونه!
.
جنت ابحُب حبيبي امحضر التابوت
وأنطيهم عذر ,, لمن يعدمونه!
.
اهواي الجانوا ايحبونه من الصوت
وقليل المثلي يمشي النظرة اعيونه!
.
السيد عنده ثوره وما حجه ابسكوت!
يحجي ابصوت الحسين ويسمعونه!!
.
يوم الكال ( كلا ) وشخص الطاغوت!
اشكد هددوا !!! ظَنهم يخوفونه!!!
.
صفوها الجيوش ... وحوت يتبع حوت!
كطعوا كل درب , أنصاره يمشونه!!
.
محمد ما سكت باقي ابهذاك الصوت
وبكل جمعه ,,, يتحدى اليعادونه!!
.
ما فاتته الفوته , البشهامه ايفوت
أده الراده ربه *بطلقه* مضمونه!
.
مثل عيسى ابن مريم بالذكر مثبوت
همه اتخايل الهم!,, من يصلبونه!
.
الشُبه لهم ! , كالوا خذاه الموت!
الكُمر فوكاهم ,, وظنهم يدفنونه!
.
السيد باجر ايرد ينصر المكبوت!
وانه احجي ابدرايه وحكمه موزونه!
.
وباجر مو بعيد انتظروا المبخوت
ويه المهدي يحضرنه وتشوفونه!
ويه المهدي يحضرنه وتشوفونه.
حسين االساعدي
رد مع اقتباس