(ميتين)
ميتين بس نضحك رسم
واعمارنه تعد ايام

وبٱخر محطاته العمر
لجاينه انشد احزام

واحدنه عايش بس نفس
ويادوبك اتشيله اجدام

ماندري باجر من امس
الوكت من خافي اشضام

والگلب صاير مگبره
مدفونه بي بس عظام

لا روح لا شهگة نفس
لافرحه من عام العام

تعبانه روحي معلعله
وبيها الحزن صار اوسام
..
ميتين بس بلا چفن
ومغسلين ابدمنه

وللمگبره شد ياحسن
كلها صفت وادمنه

محد يداويلك جرح
محد يحس ابهمنه

ميتين واحنه على الارض
وباجر حدرهه تلمنه
…
ميتين بس نمشي رسم
وجدامنه متيهه الراي

عطشان لحجاية صدگ
مو عطش ويروح ابماي

شدشد نزيفك ياجرح
ردناه دوه وصار الداي

من هاي بسك وكتفي
الجاينه اتعس من هاي

ماشفنه من عمر المضه
والضحكه چن صوت الناي

لا بال لا راحة جسد
لا امس لا نامل جاي

دنيا وخلگها توحشت
ماعدهه شور ولا راي

من هاي بسك وكتفي
الجاينه اتعس من هاي


علي تكليف الصگبان
2022