شلون نعرف العسل مغشوش لو لا
اولا خلي نتفق العسل وطعمه هو نتيجة المواد الي يتغذى عليها النحل
يعني اذا النحل يتغذى على الحمضيات راح نشوف لون العسل اول ما ينجمع يكون فاتح وتقريبا لونه ذهبي وريحته عبالك قداح
وإذا يتغذى على السدر يعني النبگ راح تكون ريحته عبالك نبگ
وإذا يتغذى على الجت يعني البرسيم راح يكون لونه كأنما بيه لمحة خضار مو اصفر ناصع
ونفس الشي بالنسبة لباقي انواع العسل
أهم صفات العسل الطبيعي هو التبلور ومعلومة يعرفوها فقط النحالين خلايا النحل المنصوبة بحقول السمسم العسل مالتها يتبلور داخل الخلية نفسها إذا برد الجو وهذا من اجود انواع العسل
إذا اكو ناس من الناصرية ممكن يتأكدون من هذه المعلومة شريحة كبيرة من اهل الناصرية ما يشترون العسل إلا بعد التبلور حتى يضمنون جودته وعدم الغش
شلون نحافظ على العسل من التبلور
ممكن نحفظه بمكان دافي ومعتم واذا تبلور عدنا العسل ممكن نرجعه لحالته السائلة أما بتعريضه لحرارة الشمس القوية أو وضعه بحمام مائي حار (حمام مريم) وراح يرجع مثل أول مرة اشتريناه
شلون يغشون العسل
أسهل طرق الغش وارخصها هو تغذية النحل على محلول مكون من الماء والسكر والنكهات المطلوبة وهنا من نشتريه راح نشوف ظاهرا كل مقومات العسل واي اختبار راح يثبت هذا عسل لكن من نوصل مرحلة التبلور عن طريق وضعه بمكان بارد ثلاجة مثلا ما راح يتبلور هنا لازم ناخذ راحتنا كلش ونعترف فلوسنا راحت بلاش واشترينا شيرة مو عسل
هسه طرق الكشف عن العسل اشكال من قلم القوپية للحبر لغيره وغيره لكن اضبط واحسن واضمن طريقة هي الطريقة الي يعتمدها النحال نفسه ياخذ مقدار ملعقة كوب عسل ويخليها بحلگه ويبلعها ويحسب 30 ثانية او اكثر شويه ومرات اقل إذا اختفت الحلاوة من الحلگ معناه هذا عسل طبيعي وإذا بقت الحلاوة لعدة دقايق معناه هذا مغشوش
بالسوگ كلش هوايه انواع عسل ومن مختلف المناشيء ومرات نشتريها بفلوس حلوة كلها مغشوشة وعبارة عن شيرة مضاف الها نكهات ومرات بدون نكهات اصلا
ولهذا نصيحة الي يريد يشتري عسل لازم يشتريه من نحال ثقة
وسلامتكم
رد مع اقتباس
المشاركة الأصلية كتبت بواسطة غدوش
