طريقة عمل شراب السكنجبيل
بعد منشور الصبح الي هو اصلا من العام كل التعليقات طالبت بطريقة عمل السكنجبيل وطبعا أقل واجب هو انزل طريقة العمل
بداية المكونات كلش كلش بسيطة ومتوفرة بكل بيت وهي خل تمر (حصرا) وشكر وباگة نعناع وأي بديل للنعناع ما يرهم لأن جربته بالريحان والبطنج ما طلع بنفس الكفاءة والطعم
المقادير
كل لتر خل يحتاج گلاصين شكر او أقل شويه اذا الخل صناعي لكن كلما زادت حموضة الخل زادت كمية الشكر المطلوبة
وباگة نعناع لكل 5 لترات خل يعني مو شرط كل لتر نخلي باگة
طريقة العمل
أول شي نذوب الشكر بالخل على البارد بعدين نخليه على نار متوسطة حتى يفور مع التقليب المستمر ليش حتى نضمن كل الشكر يذوب وما يلزگ بچعب الجدر ومن يبدي يثخن نخلي باگة النعناع ومرات اخليها من اول فورة علمود اضمن نكهة نعناع قوية وطبعا الباگة لازم نظيفة من الشوائب ومغسولة زين
من يثقل المحلول ويصير مثل شيرة الزلابية نهدأ النار ونخليه يعگد زين
من يوصل للقوام المطلوب نطفي النار ونصفيه من النعناع ونتركه يبرد وبعدين تستعملوه بألف عافية
يعني شنو القوام المطلوب يعني الثخن الي انتم تريدوه لأن بكل الاحوال راح يتخفف بالسڤن أپ او شراب الصودا او الماء المثلج
وكقاعدة اذا تبخر حوالي نص السائل او ثلثينه وهو الأفضل لكن انتبهوا ما يثخن كلش لأن بوقتها راح يصير مربى والصراحة هم طيب لكن مو الكل ترغبه
طريقة الاستعمال حسب ثخن الشراب الي طلع عدكم تاخذون منه خاشوگة خاشوگتين وتخففوها بواحد من السوايل الي ذكرتها فوگ وتشربوه بألف ألف ألف عافية
رد مع اقتباس
المشاركة الأصلية كتبت بواسطة ⭐حَـــــــــلآوَة⭐
