الشتا او شهر 11
الجو مو بارد و أقرب للحر اصلا
بس النشله و الانفلونزا و بقيه الفايروسات تنشط كل سنه بهذه الفتره من السنه
لذلك نخلي ببالنا
انه من الطبيعي ان الطفل يتمرض اسبوع او اثنين لما يطيب يرجع يتمرض بعدها بيومين
خصوصا اذا الطفل ساكن بعائله كبيره او يروح حضانه او روضه او مدرسه او البيت ما بيه تهويه جيده
و كل مره احفظوها
كل نشله من الطبيعي انه تطول اسبوعين
مو بس طبيعي
جدا طبيعي
المهم خلونا نحجي وقايه
اولا اذا الطفل صغير استمري بالرضاعه الطبيعيه
و اذا الطفل عبر مرحله الرضاعه غذيه أصناف متعدده و ركزي على اللبن لان بيه بكتريا نافعه
ما يحب اللبن
ضيفي بروبايوتك لغذاء او شراب طفلك
و ركزيلي على اللحم لان بيه حديد
و على البيض لان بيه زنك و بروتين
و بقيه الخضراوات و الفواكه
ثانيا ابتعدي عن السكريات و العصير لان السكر يضعف المناعه
و العصير طبيعي و صناعي
و ياريت لو تضيفين وياه فيتامين دي قطرات او لوحدها
ثالثا
شويه تباعد اجتماعي بالبيت
فمثلا ما نجيب طفل رقم ٢ الا بعد ما طفل رقم 1 عزلنا بغرفه منفصله
لان دائما مصدر العدوى للأخ الصغير هو الأخ الكبير
رابعا
تهويه البيت و تقليل السجاد و الفرشات و التغطيه
خامسا
عرضي الاطفال للشمس قدر الإمكان
دام الشمس حلوه و الجو جيد خل يتعرضون للشمس
سادسا
لا تلبسوهم هوايه و بالتالي يتمرضون لابسط سبب
لبس طبيعي غير مبالغ بيه
سابعا
العسل و اكيد الطبيعي وفريه بالبيت كعلاج و وقايه بس ما ننسى انه ممنوع تحت عمر سنه
ثامنا
كفيتامينات متعدده او شراب فيتامينات
ما يحتاج اذا اكل الطفل متنوع
عدا فيتامين دي
احرصي على ان ياخذ طفلك قطرات فيتامين دي
ما نختلف بعدد الوحدات
بس ما نتجاوز ارقام عاليه
هي بصوره عامه ٤٠٠ وحده دوليه تحت السنه
و ٦٠٠ وحده دوليه فوق السنه
تاسعا
الحليب ما نكثر منه بعد عمر السنه و ما نعبر المرتين باليوم
و بعد السنه و نص يصير كوب واحد فقط
لان كثر الحليب يسوي فقر دم
و فقر الدم يقلل المناعه
عاشرا
ابعدي طفلك عن التدخين و المكان اللي صار بيه تدخين
مثلا
الاب يدخن بالصالة
لا تخلين طفلك يروح للصاله حتى لو ابوه ما موجود بالصالة لان الدخان يعلق على الأثاث و الستائر
او ببساطه اطلبي من المدخن يدخن خارج المنزل
دمتم بود و صحه
شتاء دافيء لكم و لقلوب صغاركم
د. سيف سمير البياتي اخصائي طب الاطفال
رد مع اقتباس
المشاركة الأصلية كتبت بواسطة مِـيهہرَمــآهہ ♬❥
