شط الديوانية يفرفح ، لو مرّت من يمه صبيحة
ويگوم يصيح بكل صوته ، حطيلي من زلوفچ ريحه
ومن ضحكتها الناس تبدل .. تنزع ثوب وتلبس ثوب
وگلوب الشارع من يطفي ، تطلع صبحه بميت گلوب
وفطور الصايم يتأخر .. تطلع صبحه يثور الطوب
وكل الديوانية تعيّد .. هذا الصوب وذاك الصوب
ما اگللكم كلش حلوة ، بس يالوادم مدري شبيها ؟
لا كلش سمره ولا بيضه .. مدري شلون الله مسويها
ومدري شلون البيت يلمها ، ومدري شلون أمها تغطيها
ومدري شلون الشارع صابر ، لسا ما ماكل رچليها
لو حلّت صبحه ضفايرها ، تحبل حته العاگر منها
أي والله .. والحبله تجيب !
تتناوب هيه وشمس الله ، تطلع وحده .. ووحده تغيب
وبساحات التدريب من تمر ، يبرد كل عرگ التدريب
ضحكت وتبلّط ( حي رفعت )
وطگ ( حي العصري ) بساتين
بيوت الطين قصور ارتفعت ...
لا رد الله بيوت الطين .
( المرحوم كاظم خبط الجبوري )
رد مع اقتباس
المشاركة الأصلية كتبت بواسطة sawsanmahmoud
