ابني مايحجي
#سلسلة_التطور_اللغوي
السمع
حاسة السمع رئيسيه وحتمية لاكتساب الكلام ثم اللغة
في حال كانت حاسه السمع معطوبه او ضعيفه فان ذلك يؤثر بشكل مباشر على قدره الكلام
لذلك كل ام لازم تعرف تراقب حاسه السمع واي شكوك تصير عدها لا تتماهل ابدا ابدا ابدا
مباشرة تروحين للطبيب المختص يفحصه وينطيك الجواب
وفي حال ما راحت منك الشكوك
روحي طبيب ثاني وثالث وعشره الى ان تطمنين
كلما تعالجت حاسه السمع مبكرا كلما كسبتي سنوات وسنوات من التدريب والمتابعه
صديقة معرفه شخصية كدرت تعرف خلل بحاسه السمع عند طفلتها بعمر شهرين
وزارت بدل الطبيب 10 وجانوا يكولون لها لا مابيها شي او بعد وقت لكن لانها ام ولانها عدها اساسيات الموضوع تم تاكيد التشخيص بعمر 6 شهور
والطبيب كال لها ... عفيه عايج هاي من النوادر يتابعون بهيجي عمر
نسال الان شلون نراقب حاسه السمع؟؟؟
المرحلة الأولى
تحدث بعد الولادة
تتميز برد فعل لا ارادي ، يمثل (جفلة) أو رجفة الطفل عند سماع صوت عالي
وهو لايعني (خوف الطفل)
هو مجرد رد فعل لا ارادي
يعني من يصير صوت عالي تشوفين الطفل ينخض جسمه كله حتى لو نايم تصير هاي الرجفة
يعني هاي حاسة السمع دتوصل ايعاز
اذا شفتي لاااا ابدا مايجفل من يصير صوت ولا عبالك وحتى من هو نايم ..ولا مره ولا مرتين .... متابعة ضروري
المرحلة الثانية
تحدث في حوالي عمر شهر كبدايه (وتختلف من طفل لطفل حسب سرعة النمو العصبي )
وتتمثل ببكاء الطفل مع الجفلة في حال حدوث صوت عالي، حيث يبدأ بالطفل بالبكاء طالبا النجده (معتبرا ذلك الصوت العالي خطر يهدد حياته)
يعني من يصير صوت مفاجى مخيف مثلا صوت انفجار بالون... ينسد الباب قوي ... صوت هورن السيارة بالشارع صوت الخلاط والمكنسه الكهرباء وغيرها نشوف الطفل ينرعب
ويخاف ويكوم يبجي
(اكو تستمر وياهم لعمر السنه )
اذا لاحظتي طفلك مايسوي اي رد فعل لاصوات عاليه فجائية... توجهي للطبيب
المرحلة الثالثة
تحدث بعمر شهرين ونصف تقريبا كبدايه (وتختلف من طفل لطفل حسب سرعة النمو العصبي )
يبدأ بفهم معنى الاصوات، (وليس الكلمات )
مثل نغمة صوت الأم : اذا وبخت الام الطفل سوف يبدا بالبكاء ، رغم أنه لايفهم الكلمات
يبدأ بتحديد مكان مصدر الصوت
يعني من تلعبين ويه الطفل وتكليله (دمرتني بارحه اويلي منك ليش متنام ولك ليش متنام )
..بس بصوت مبتهج وضحك حتشوفي يفرح ويضحك...
والعكس مثلا تكولين له (عفيه حباب بارحة نامت من وقت ) بس بنبره عصبيه وكانما انتي ضايجه ونتره حتشوفي يبرطم ويبدي يبجي
وهاي اللعبه اغلب اهالينا قبل يلعبوها مع الطفل يرزلوه بصوت مبهج ويمدحوه بس باسلوب رزاله ويضحكون على رد فعله الي يتبع النغمه ما يتبع معنى الكلام
اذا شفتي طفلك من تلعبين وياه هاي اللعبه مو يمه الموضوع ولا يضحك وياك ولا يبرطم على النغمه.... ضروري تتابعين وياه عن كثب..
أما تحديد الاصوات
فهي ان تلزمين لعبه مثلا خرخاشه وتخليها فوك رأسه بمكان مايشوفه وتطلعين الصوت
اذا راسا بدا يتلفت ويحاول يشوف شنو هاي يعني الامور تمام
وغيري كل فتره بمكان وشوفي يحاول يندار لمصدر الصوت لو لا
اذا مايندار ولا ينتبه ولا يحاول يلكاه وكانما بعالم ثاني ... ضروري المتابعة
المرحلة الرابعة
يبدأ بين عمر 6 اشهر -12 شهر كبدايه (وتختلف من طفل لطفل حسب سرعة النمو العصبي )
يبدأ بفهم معنى الكلمات
يعني وين بابا؟؟ يباوع على بابا
وين رجلك ياشر على رجله او يباوع عليها ... وهكذا
وبعدها يبدي ينفذ الاوامر انه ارفع راسك يرفعه
تعال هنا... يجي .... مع الانتباه الكلام يكون بدون اشارات يعني حتى نتاكد هو كاعد يفتهم الكلام ممكن بالبداية ناشر حتى يتعلم بس بعدها ننطي اوامر بدون اي اشاره ونتابع تجاوبه اذا يتجاوب تمام يعني ديسمع تمام وديفهم تمام ودينفذ ...
وتكون اوامر بسيطه من ضمن الحياه مو اشياء يدخل بيها العناد
اذا وصل لهاي المرحله يعني طفلك ان شاء الله سليم سمعه وماعنده مشكله
اذا لا تشوفه فاصل وتحجي وماينفذ الاوامر ... ضروري المتابعة
اغلب حالات تاخر الكلام هو بسبب ضعف حاله السمع
ومن الحالات الي تقهر انه الاهل يتماهلون
اعرف حاله وصل عمره 4 سنوات ومايحجي واهله بغير عالم ويكولون لا هو عصبي ويعاند تالي طلع المسكين يحتاج زرع قوقعه
لذلك اكرر طفلك مايحجي وما مر بهاي المراحل الاربعه او واكف بمرحله منهم ومايتطور (مثلا عمره سنه وبعده على اقل صوت جسمه يجفل) .... توجه للطبيب مباشره
وللموضوع تكمله
د.اسماء
رد مع اقتباس
