متى گلبك
متى ممكن يصافح بالوله گلبي؟
متى گلبك
متى ممكن يصافح بالوله گلبي؟
متى هالبال يتطمن على احساسي وعلى حبي
ضوجة البيت والروتين الكاعد يتكرر كل يوم جبرتني اركع السيارة سلف واطلع بدون ما احدد وجهتي.
طلعت بالسيارة امشي ع كيف، عملياً عيوني بالشارع وذهنيا تفكيري بغير مكان وبغير زمان.
لمحت صديق قديم من زمان مشايفه اسمه "علي" كاعد لحاله ومنتچي ع حايط بيتهم.
طبكت السيارة بالجانب الثاني من الشارع ونزلت امشي بأتجاهة، هسة صار عندي وجهة جديدة اروحلها بدون ما احددها.
سلمت عليه وهو اول ما شافني وجهه ضحك ولسانه ماوكف من الترحيب والتهلي.
كعدت بصفه وبدينا نحجي، صار هواي ما كاعد هالكعدة وما حاجي وي إنسان صديقي بطفولتي ومراهقتي.
الغريب رغم صداقتنا ومعرفتي بأهله ما دعاني ادخل جوا للبيت و ما ضيفني اي شي حتى مي مجابلي.
اتجاهلت هذا الأمر يجوز نسى يجوز عنده ضرف بالبيت لأن علي الاعرفه كلش كريم ونفسيته طيبة وخلوق وعروبي فلازم يكون عنده سبب.
سألته : وين هالفترة؟ .. صار سنوات ماشفتك ولا سمعت اخبارك وكل مرة اجي هنا مالكاك موجود.
كال : جنت بالسجن وما صار ساعات من طلعت.
انفتح صندوق التسأولات وبدأ عقلي يشمر اسئلة وخفت اسألة ويكون السبب خاص
ومع ذلك بادرت وسألته : اللي اعرفه انت مو صاحب مشاكل شجابك على السجن؟
كال : سويت جر-يمة وبدل ما يعاقبوني كرموني وكان من شروط التكريم انسجن ومرتاح بالسجن، شوية واحجيلك القصة كلها هسة سولفلي الوضع السياسي الاجتماعي شلونه الناس شصار ما صار من وراي.
عقلي ضل أسير بعبارة (سويت جر-يمة وبدل مايعاقبوني كرموني) لأن غريبة و مو منطقية.
بديت احجيله عن الوضع السياسي بالبلد وهو يسأل و اني اجاوب.
سألني عن امه هم اجي ازورها بفترة غيابه مدري سجنه؟ وكتله الدوام ومشاغل الحياة اتعطلني عنها بس كل عيد اجي ازورها واشوف شمحتاجه.
كال : اخوي حيدر من خطب خو ماقصرتوا وياه؟
كتله وكفنا وياه بالخطبة وساعدناه بالعرس رغم هو سوا عرس مختصر.
بعدين سألني عن المنطقة وبدا يلتف حول بيت معين بالمنطقة وكل شوية يسأل عن واحد من اهل هذا البيت، وكل مرة اجاوبه.
ولحدما سألني عن بنتهم "اسراء" وين صارت؟
كتله اللي اعرفه هي مهندسة هسة واتزوجت صار سنة تقريباً.
فز واتكدر خاطره ووجهة سوّمر من كتله هيج.
و كال : سامي هاي البنية جنت احبها وتحبني وچنا متفقين نتزوج واهلنا موافقين، كلش متعلقين ببعض حتى اخوتها اصدقائي وفرحوا من خطبت منهم.
اتخيل اخر لقاء جمعني بيها اجت لبيتنا هي وامها
جانت تضحك بشكل ملائكي الوجه دائري والعيون ناعسات
المستحى والحشمة كلها متچومة بوجهها.
شعرياً وغنائياً هي نفسها اللي كتب عنها نزار قباني وغنا لها العندليب الاسمر (في حياتكَ امرأةً يا ولدي عيناها سبحان المعبود، فمها مرسومٌ كالعنقود، ضحكتها أنغامٌ وورود، والشعرُ الغجري المجنون يسافر في كل الدنيا .. قد تغدو امرأةً يا ولدي يهواها القلب هي الدنيا).
سحبتها للمطبخ بقيت بس اباوع بعيونها بعدين كتلها : اني ما خايف من غيابج و لا خايف بيوم انحرم من ضحكتج هاي، اني خايف اتعود على غيابج
اسراء اني طول عمري احلم بمرة مثلج، أدب وحشمة وثقافة ووجه نوراني
هيج مرة اعتبرها غصن اتمسك بيه وهسة بعد مالكيتج راح احارب في سبيل ابقى وياج.
ما ادري ليش كلت هيج بس يمكن جنت حاس اني راح اغيب.
لو شايف عيونها الناعسات شلون نزل الدمع منهن وقتها وشلون التلعثم احتل لسانها، وهسة اتكلي اتزوجت غيري! لا ماصدك سامي.
ما جان عندي جواب لكلامه هذا، واحتاريت اجاوب لسانه لو عيونه الغورگ بيهن الدمع؟
كتله بنوع من العتب وحتى اطلعه من مود الذكريات والحسرة : غير انت صار خمس سنوات مختفي .. وهي البنية هم جزاها الله خير انتظرتك بما فيه الكفاية.
اي صدك تعال احجيلي شنو انسجنت وكرموك كلشي مفتهمت ترا؟
ما جاوبني ورجعت عدت السؤال عليه وهم ماكو جواب.
التفتت لوراي لكيت عبارة على الحايط "الدار للبيع" وعلى يسارها بوستر بيه صورة علي وبيه عبارة "مفقود الأثر الشهيد الملازم اول في الجيش العراقي الباسل علي .. استشهد عام ٢٠١٧ في معارك التحرير.
انتچن اديه على رجليه وشالني وعرفت جواب سؤالي ..
لگيتلكم هاي
صباح الخير
ماكان لغزا تكشّف سترها
لو كان حكّام البلاد رجالا
تخيلوا لو ما فلان وفلان.. هسه قطرة دم ما تراق .. وماكو لا كيان صهيوني ولا أمريكا..
كم وجه عندكم ؟!
تقزمي فـي عيـن حسـادي وأنـا عمـلاق... فرض لأن علـوي عـن وطاهـم شـي ربــي ملزمه
ما تشوف حجم الشمس متقزم على أصحاب الارض... متقزمين ويحسبون الشـمـس جات مقـزمةالمشاركة الأصلية كتبت بواسطة سورين
