تعال بغيبتك عطشان دني شفافك اسعفني
تعال الليل طوّل حيل بس انت اليريحني
تعال لحضني احس بردان جيب رموشك وغطني
تعال وچم تعال شبيك مد ذرعانك وظمني
تعال الدنيا خلصانه اخذني لصدرك احضني
من بعدك صفيت رماد اطيرن والهوى يردني
:::::::::::
تعال بغيبتك تايه لا اندل ولا افهم
تعال وقيس ذرعاني عليها الغير مايرهم
تعال دموعي تنزل سيل ماي ومنخبط بالدم
تعال وشوفني بياحال مريض لوّحدي اتألم
تعال وجيب قمصانك وصفولي العلاج الشم
تعال بشوفتك مبخوت تردلي الروح واتلملم
:::::::::
تعال بغيبتك حرگه بوسط الگلب والريه
تعال وشوف شماتي دگ ورگص يوميه
تعال الحگ بگايا الحال ماظل كل امل بيّه
تعال سوالفك حلوة كل سالوفه حنيه
تعال وخلّني من شفتك اضوگ رضابك شويه
تعال وچم تعال شبيك دنيا وتدري مگضيه
:::::::::
تعال البس قميص النوم تدري خياطه عاجبني
تعال اشبگني مامرتاح اريدك هسه جاوبني
تعال الليل اظلم حيل جرّب وجهك وضوني
تعال وخلني أأمن بيك هاي الدنيا خانتني
تعال وخلني بعيونك اتيهن وانت التردني
تعال ونلبد آنه وياك اخاف الناس تحسدني
::::::::::
تعال وحطني ترچيه تتلولح على الرگبه
تعال وسوّني طوگ شبيك واحسبها ولك طلبه
تعال بكلشي اقبل بيك واليحچي عدو نحسبه
تعال وحضّر المروّد وأ حمر شفتّك رتبه
تعال سنيني خلصانات عاشگ حاير بذنبه
تعال وذنبك عليّه وربك ماظن يحسبه
توفيق الصكبان،
رد مع اقتباس
