اقرأ وجوه ناسك واعزل المعلول
وبيَّن لي البري من الذمته مشكولّة
ما أقبلها منك لا تگلي شلون
انت العارفة التعرف المعلولة
صفرة وجوههم مو مسحة الإيمان
بس سم العگارب طارف ذيوله
ونعم بعض اللسن حدين وقت القول
بترة وباشطة وبالچذب مصقولة
هارون الرشيد شكثر ضل الناس
لوما وضحنله جنون بهلوله
وانا صويحبك هم شاعر وبهلول
وحذرتك وگتلك خاف من ذولة
كلهم مو أهلنا الحادي والجَمّال
لا من زولنا ولا حنا من زوله
ماگلك مغفل لا ألف حاشاك
ومعاذ الله هذا النعت ما گوله
بس خافك تظن دورة حِسن بالعين
مو دورة حِسن لا والحسن حولة
يا صافي النوايا اختلط هذا وذاك
صفي عيال بيتك واعزل الثولة
بقياسات الولاء الكل عبيدك هاي
العراق انتَ المُطاع السيد المولى
على ماذا التحابي وچلمة التنگال
شو كلمن يشخبط گلت صفگوله
خو الأعور گله أعور مو كريم العين
وأبو الجنيب گله بمشيتك لولة
حط أذنك وميّز نعم كلها أصوات
اكو عفطة عنز وهناك هلهولة
فرق صوت الخطيب وصيحة الدلال
وفرق ما بين عدلة وبين معدولة
علامك يا وطن كثرت عليك الفوس
هدماً والمعاول بيك معمولة
يا هو الوهمك بالغنم يسرح ذيب
وليش انطيت صوفك غير غازولة
شجاك وبعت سرك وانت سرك بير
ومغطى بطلاسم محد ينوله
ضاع القفل منك لو نسيت الباب
وخليت الحرامي يطبلك بطوله
بيتك خزنة الله وفاتح البيبان
وغيرك كلشي ماكو وبوبه مقفولة
عدمن امنتني وناس تاكل ناس
وأقطاب السياسة بغيري مشغولة
إذا عن الأحزاب الفضل لله هواي
بس واحد يگل للثاني حزبوله
والحل والعگد بيدين أبو الجنيب
عذراً يا وطن هم هاي معقولة ؟
معقولة الشمر ناطور وأّمن بيه
وأنا سيفي گصب وزنودي مشلولة
شگلك ياوطن ماظل بعد ينگال
حط رحلة القصيد وطيّح حموله
شگلك ياوطن يهديب بالكلفات
إذا حملك ذهب واغذاك عاگولة
يبو حجي المعدل صرت ترطن ليش
يا راعي التراث المحد يطوله
استهوتك حضارة آل توني بلير
لو غشّتِك لهجة بوش معسولة
الخلل مو بالزَمل حادي الزَمل بي عيب
ما يعرف طبعنا وشتت زموله
وهي بيا شرع زلماي راعي الشور
وانا أسمع وانفّذ كلشي اليگوله
بعد مابية اعاتب ياوطن مليت
انا انزفت كلشي وخلگك شطوله
ثوبك من درع واردانك مشرعات
واتمر عالعدو بثياب مهدولة
يالعمرك سبعتالاف شنهو شبيك
شو رديت تزحف هاي مقبولة
وضعك ما يسرني وحالك أصعب حال
لـ انت الشادها ولا هية محلولة
وضعت كلك بكبرك وانا ضعت وياك
راس المال ضاع وضاع محصوله
ويا راعي النفط راح النفط نهبوه
والزئبق الأحمر كنسوا أحقوله
وعلى الأحوط وجوباً بعد ما كنسوه
ركعتين بشرع زلماي صلوله
من باب العدالة وحفظ حق الناس
سواءً تنقبل أو غير مقبولة
المهم باگوا وقسموا وإنتهى الموضوع
وكلمن شال حصته وترّس عدوله
وردينا انتـگاود بس أنا وچلوب
نركض على المامش والعشة تولة
وسحقاً يا نفط يا لعنة التاريخ
يا نظرة حسد بعيون مكحولة
من يوم الطلعت بگاعنا لهاليوم
جنابك مشتعل والناس مشعولة
انت لغيرنا نعمة ورفاه وخير
وعلى شعب العراق سيوف مسلولة
البدو شيّدت دنيا وعمروا أوطان
وانت بهالوطن هذا العبت چولة ؟؟
ليش بهالوطن هذا إلعبت چولة ؟؟؟
رد مع اقتباس
