بالصحافه العالميه خبر
نازل بگاع المواكب گمر
يا خلگ بمتونه شايل نهر .. للمشايه
…
يهل العالم خبر نسمعه بشاشات الحب ينعرض
نزل الكافل من الجنه جنه ويمشي عالارض
سمع الماي وعاف جروفه وراح اعله چفوفه ركض
اصل الماي من چفوفه
وصل لحسينه ويطوفه
وگف يم حضرته انشوفه
تحيه اخذ بچفوفه ابو فاضل
انحناله وگاله حچايه
اتأذن احمل الرايه
اجتك ناس مشايه وانه الكافل
گله منك والنعم يالأخو
يا بو فاضل انت كلك كفو
انت خيمه وانت رايه وابو .. للمشايه
…
ضوه مر بيهم موكب موكب انطه لكل موكب علم
بذيچ چفوفه الما مگطوعه يمسح عله روس الخدم
گال الخادم بيته بعيني عيني مو بيت السهم
خدام حسين بعيني
ونعم منكم اهل غيره
مواقف تارسه الديره
تخلي الوادم بحيره مواكبكم
كتبتو اعله الدرب جمله
غريب الكرم واحنه اهله
بهله وبگمگم ودله سوالفكم
يالكرمكم طبعه ما يختلف
الواحد تعزبوله مثل الألف
عيني شافتكم نهر ما يجف .. للمشايه
…
طلع الكافل للمشايه والهم فتّح موكبه
اعليهم سلّم واحد واحد هله صاح ويا مرحبه
ايغطي بهذا هذا ويوكله وهذا بچفه ايشربه
صاحب موكب عباس
گمر ماكو گمر غيره
ترس گاع وسمه بخيره
طعم زاده هله وغيره ابو الغيره
چبير الطف يسمونه
ابد ما يخله ماعونه
البشر كلهم يسمونه
ابو الغيره دفتر المشايه حصراً إله
الطير اذا لحسين اجه يسجله
والجهات الاربعه بكربله .. للمشايه
…
اسكت اسمع لا تتنفس صدّر فرمان الگمر
كلمن يكسر خاطر زاير يكسرله الكافل ظهر
ضيف حسين يظل خط احمر وكلمن عادا بالبشر
بچفه يسطره العباس
اليغث بالناس خطاره
تسطره يمينه ويساره
بيهن من علي شاره
دخيل چفوفه
اليعزب ضيف ابو اليمه
يصعده الگمر للقمه
ابو فاضل صدگ زلمه
يحب اضيوفه
معدل بكلهن غيور اعربي
يقره بعيونك يضيف شتبي
بكل سنه يفتح مضيفه الأبي .. للمشايه
…
آخر يوم بهاي الخدمه عالوادم كلش صعب
تشوف الخادم لم الموكب ساكت و عيونه تصب
بس الكافل يبقه متاني لآخر زاير بالدرب
زينب جايه من الشام
يحضّر بيده محملها
هله يا هيبتي يگلها
هله يعيون كافلها
هله يا زينب
يشوفي ويا بعد شوفي
يخيتي ردن اچفوفي
ارحب گمت بضيوفي
اخوچ معتب
ايوصّل ضعونه ويرد للسمه
وترجع اچفوفه اعله چف فاطمه
ويكتب اسماء السنه القادمه .. للمشايه
…
كلمات الشاعر : كرار حسين الكربلائي
....
Mp3
.
رد مع اقتباس
